दाङका जंगलमा प्रहरीको ‘सर्च अप्रेसन’ : झाडीमा लुकाइएका ८ नाल भरुवा बन्दुक बरामद

३० भदाै,दाङ । दाङका विभिन्न स्थानमा रहेका जंगल तथा झाडीबाट प्रहरीले ८ नाल अवैध भरुवा बन्दुक बरामद गरेको छ। जंगलका झाडीमा भरुवा बन्दुक लुकाएर राखिएको विशेष सूचनाका आधारमा जिल्ला प्रहरी कार्यालय दाङले बुधबार बिहान ६ बजेदेखि ११ बजेसम्म विशेष अप्रेसन सञ्चालन गरेको थियो।

सो क्रममा विभिन्न स्थानमा लुकाइछिपाइ राखिएका ८ नाल एकनाले भरुवा बन्दुक बरामद गरिएको प्रहरीले जनाएको छ। प्रहरीका अनुसार इलाका प्रहरी कार्यालय भैसाहीबाट खटिएको टोलीले राजपुर गाउँपालिका–७ भैसाहीस्थित भैसाही खोलाको किनार नजिकैको झाडीबाट १ नाल, इलाका प्रहरी कार्यालय कमिरेचौरको टोलीले बंगलाचुली गाउँपालिका–१ ठुलोभिर सामुदायिक वनबाट २ नाल र प्रहरी चौकी गोल्टाकुरीको टोलीले दंगीशरण गाउँपालिका–१ बुर्केसालको झाडीबाट २ नाल भरुवा बन्दुक बरामद गरेको हो।

 त्यस्तै, प्रहरी चौकी चिराघाटको टोलीले शान्तिनगर गाउँपालिका–३ स्थित सिर्जना सामुदायिक वनको माथिल्लो बाटोको नालामा सेतो बोराभित्र लुकाइराखिएको १ नाल तथा अस्थायी प्रहरी पोष्ट रिहारको टोलीले लमही नगरपालिका–९ स्थित आमखोली सामुदायिक वनको झाडीबाट २ नाल भरुवा बन्दुक बरामद गरेको प्रहरीले जनाएको छ।

 बरामद भएका बन्दुक कसले र कुन प्रयोजनका लागि लुकाएर राखेको भन्ने विषयमा प्रहरीले थप अनुसन्धान गरिरहेको जिल्ला प्रहरी कार्यालय दाङका सूचना अधिकारी प्रहरी नायव उपरीक्षक डा. हेमबहादुर केसीले जानकारी दिएका छन्।