बारा–पर्सासहित देशभर धुमधामका साथ मनाइँदै विश्वकर्मा पूजा

१ असाेज,बारा । भगवान् विश्वकर्माको पूजा आराधना गर्दै आज बारा, पर्सासहित देशभर विश्वकर्मा पूजा धुमधामका साथ मनाइँदैछ।

उद्योग, कलकारखाना, वर्कसप, निर्माण क्षेत्र तथा विभिन्न पेशा–व्यवसायमा प्रयोग हुने मेसिन, औजार र उपकरणको पूजा गरी विश्वकर्मा जयन्ती मनाउने परम्पराअनुसार बिहानैदेखि विभिन्न स्थानमा पूजाआजा तथा धार्मिक कार्यक्रम भइरहेका छन्।

विश्वकर्मालाई हिन्दू धार्मिक परम्परामा देवशिल्पी तथा वास्तुकलाका ज्ञाता मानिन्छ। धार्मिक मान्यताअनुसार भगवान् विश्वकर्माले विभिन्न देवदेवीका लागि भव्य संरचना, भवन तथा दिव्य अस्त्र–शस्त्र निर्माण गरेको विश्वास गरिन्छ।

यही कारण विश्वकर्मा पूजालाई सीप, श्रम, प्रविधि, निर्माण र सिर्जनासँग जोडेर हेर्ने गरिन्छ। विश्वकर्मा जयन्तीका रूपमा समेत मनाइने यस पर्वमा कलकारखाना तथा उद्योगमा विश्वकर्माको प्रतिमा स्थापना गरी पूजा गर्ने, मेसिन, औजार तथा उत्पादनमा प्रयोग हुने सामग्रीलाई सफा गरेर पूजाआजा गर्ने चलन छ।

कतिपय स्थानमा पूजा सकेपछि विश्वकर्माको प्रतिमा नदी, पोखरी वा अन्य जलाशयमा विसर्जन गर्ने परम्परा पनि रहेको छ। धार्मिक विश्वासअनुसार विश्वकर्माको पूजा गर्दा काममा सफलता, व्यवसायमा उन्नति, औजार तथा मेसिनको सुरक्षा र आर्थिक समृद्धि प्राप्त हुने विश्वास गरिन्छ।

 त्यसैले उद्योगी–व्यवसायीदेखि मेकानिक, शिल्पकार, निर्माणकर्मी, प्राविधिक तथा विभिन्न पेशा–व्यवसायमा संलग्न श्रमिकले यस दिन आफ्ना काममा प्रयोग हुने साधनको पूजा गर्ने गर्छन्।

 नेपालसँगै भारतका विभिन्न क्षेत्रमा समेत विश्वकर्मा पूजा विशेष उत्साहका साथ मनाइन्छ। यस अवसरमा उद्योग तथा कलकारखानामा विशेष पूजा, प्रसाद वितरण तथा सांस्कृतिक कार्यक्रम आयोजना गर्ने परम्परा रहेको छ।

 विश्वकर्मा पूजाले धार्मिक आस्थासँगै श्रम, सीप, प्रविधि र उत्पादनलाई सम्मान गर्ने संस्कृतिको समेत प्रतिनिधित्व गर्ने पर्वका रूपमा महत्व राख्दै आएको छ।