बागलुङमा पहिरोको वितण्डा : १२ जनाको मृत्यु, एक महिला बेपत्ता

१३ असाेज,काठमाण्डाैं । अविरल वर्षासँगै आएको पहिरोमा परी बागलुङमा हालसम्म १२ जनाको मृत्यु भएको छ भने एक महिला बेपत्ता भएकी छन्।

जिल्ला प्रहरी कार्यालय बागलुङका अनुसार यही असोज ९, १० र ११ गते परेको अविरल वर्षाका कारण जिल्लाका विभिन्न पालिकामा पहिरो र वर्षाजन्य विपद्का घटना भएका हुन्।

पहिरोमा पुरिएर मृत्यु हुनेमा पाँच पुरुष, चार महिला र तीन बालबालिका रहेका छन्। एक महिला अझै बेपत्ता रहेको प्रहरीले जनाएको छ। बेपत्ताको खोजी तथा उद्धार कार्य जारी रहेको र क्षतिको थप विवरण संकलन भइरहेको प्रहरीले जनाएको छ।

 प्रहरीका अनुसार बागलुङमा ५१ घर पूर्णरूपमा र ५१ घर आंशिक रूपमा क्षतिग्रस्त भएका छन्। त्यस्तै, १० गोठ पूर्ण र एक गोठ आंशिक क्षति भएका छन्। विपद्का कारण तीनवटा झोलुङ्गे पुल पूर्ण रूपमा क्षतिग्रस्त भएका छन् भने दुई प्रहरी कार्यालय र दुई हाइड्रोपावरमा आंशिक क्षति पुगेको छ।

 एउटा विद्यालय आंशिक रूपमा क्षतिग्रस्त भएको छ। त्यसैगरी, एउटा वडा कार्यालय, एउटा रिसोर्ट र एउटा कृषि फार्म पूर्ण रूपमा क्षतिग्रस्त भएका छन्। वर्षा र पहिरोका कारण २५६ पशुचौपाया र २१५ कुखुरा समेत मरेको जिल्ला प्रहरी कार्यालय बागलुङले जनाएको छ।

 प्रहरीका अनुसार विपद्बाट भएको क्षतिको थप विवरण संकलन तथा उद्धार कार्य जारी रहेकाले क्षतिको विवरण अझ बढ्न सक्ने जनाएको छ।