टाइगर श्रफको गाडीमा गोली प्रहार प्रकरणमा दुई महिलासहित थप चार पक्राउ

५ कात्तिक,काठमाण्डाैं । बलिउड अभिनेता टाइगर श्रफको गाडीमा गोली प्रहार गरिएको घटनामा हतियार उपलब्ध गराएको आरोपमा दुई महिलासहित थप चार जनालाई प्रहरीले पक्राउ गरेको छ।

भारतीय सञ्चारमाध्यमका अनुसार दिल्ली प्रहरीको विशेष टोलीले मंगलबार चार जनालाई पक्राउ गरेको हो। पक्राउ पर्नेमा हरियाणाको सोनीपतका २१ वर्षीय कुनाल र १९ वर्षीय सुमित तथा उत्तर प्रदेशका २३ वर्षीया राधा र बबिता रहेका छन्।

 प्रहरीका अनुसार उनीहरूले घटनामा संलग्न भनिएका आक्रमणकारीलाई हतियार उपलब्ध गराउन सहयोग गरेको आशङ्का छ। पक्राउ परेका चारै जनालाई अदालतमा उपस्थित गराएपछि मुम्बई प्रहरीको अपराध अनुसन्धान विभागले थप अनुसन्धानका लागि आफ्नो नियन्त्रणमा लिएको छ।

 यसअघि अक्टोबर १८ मा मुम्बईको जुहु क्षेत्रमा फुटबल खेलेर फर्किने क्रममा टाइगर श्रफको बीएमडब्ल्यू गाडीमा गोली प्रहार भएको थियो। मोटरसाइकलमा आएका तीन जनाले गोली चलाएर फरार भएको प्रहरी अनुसन्धानबाट खुलेको छ। 

घटनामा टाइगर श्रफ सुरक्षित रहे पनि उनका चालक र अर्का एक व्यक्ति घाइते भएका थिए। प्रहरीले घटनामा संलग्न भएको आरोपमा यसअघि तीन जनालाई पक्राउ गरिसकेको थियो।

 प्रहरीले घटनामा हतियारको व्यवस्था गर्ने व्यक्ति तथा अन्य सहयोगीको संलग्नताबारे थप अनुसन्धान गरिरहेको छ।