काठमाडौंमा १२ लाख २९ हजार रुपैयाँसहित २१ जना जुवा खेल्दै गरेको अवस्थामा पक्राउ

१८ कात्तिक,काठमाण्डाैं  । काठमाडौंको बूढानीलकण्ठ नगरपालिका–४ पासिकोटमा जुवा (कौडा) खेलिरहेको अवस्थामा १२ लाख २९ हजार ६ सय रुपैयाँ नगदसहित २१ जना पक्राउ परेका छन् ।

 जिल्ला प्रहरी परिसर काठमाडौंका अनुसार सोमबार राति करिब ११ः१५ बजे गोप्य सूचनाका आधारमा खटिएको प्रहरी टोलीले दुईतले टिनको टहरामा छापा मार्दा उनीहरूलाई कौडा खेलिरहेको अवस्थामा नियन्त्रणमा लिएको हो ।

प्रहरीले घटनास्थलबाट कौडा ३३ थान, तास १७ बुक, नगद १२ लाख २९ हजार ६ सय रुपैयाँ र २३ थान मोबाइल बरामद गरेको जनाएको छ । प्रहरीले जुवामा प्रयोग भएको सवारीसाधनसमेत नियन्त्रणमा लिएको जनाएको छ ।

पक्राउ पर्नेमा १६ पुरुष र ५ महिला रहेका छन् । उनीहरू काठमाडौं, नुवाकोट, काभ्रेपलाञ्चोक, सिन्धुली, सिन्धुपाल्चोक, रसुवा, भक्तपुर, चितवन, झापा र सुनसरीलगायत जिल्लाका बासिन्दा हुन् ।

प्रहरीका अनुसार जुवा खेलाएको भनिएको कोठा भाडामा लिएर बस्दै आएकी नुवाकोटको बेलकोटगढी नगरपालिका–४ घर भएकी ४१ वर्षीया प्रतिभा तिमल्सिनासहित २१ जनालाई नियन्त्रणमा लिइएको हो

। उनीहरूमाथि जुवासम्बन्धी कसुरमा अनुसन्धान गर्न जिल्ला प्रशासन कार्यालय काठमाडौंबाट पाँच दिनको म्याद थप अनुमति लिइएको जिल्ला प्रहरी परिसर काठमाडौंका प्रवक्ता प्रहरी उपरीक्षक दानबहादुर थापाले जानकारी दिएका छन्।