एमाले स्थायी कमिटी बैठकका निर्णय : मंसिरमा राष्ट्रिय भेला, १४ जना केन्द्रीय सदस्यमा मनोनीत

२४ असोज,काठमाण्डाैं । नेकपा एमालेको स्थायी कमिटीको प्रथम बैठकले आगामी मंसिर पहिलो साता राष्ट्रिय भेला आयोजना गर्ने निर्णय गरेको छ।

अध्यक्ष केपी शर्मा ओलीको अध्यक्षतामा असोज २२ गतेदेखि तीन दिनसम्म बसेको बैठकले वडा तथा पालिका अधिवेशनको मिति निर्धारण गर्नुका साथै विभिन्न संगठनात्मक निर्णय गरेको हो।

 बैठकले पार्टीका वडा कमिटीहरूको अधिवेशन आगामी मंसिर २६ गते र गाउँपालिका तथा नगरपालिका कमिटीहरूको अधिवेशन पुस ४ गते सम्पन्न गर्ने निर्णय गरेको छ। राष्ट्रिय भेलामा प्रदेश कमिटीका पदाधिकारी, जिल्ला कमिटीका पदाधिकारी, पालिका कमिटीका अध्यक्ष तथा उपाध्यक्ष र सबै तहका जनप्रतिनिधिहरू सहभागी हुनेछन्।

 वडा तथा पालिका अधिवेशन सम्पन्न भएपछि प्रदेशस्तरीय भेला आयोजना गर्ने निर्णयसमेत बैठकले गरेको छ। मधेश प्रदेशसभामा एमालेकी समानुपातिक सांसद जैनब खातुनको निधनपछि रिक्त रहेको स्थानमा नाजिमा खातुनलाई मनोनयन गरी निर्वाचन आयोगमा लेखी पठाउने निर्णय बैठकले गरेको छ।

त्यसैगरी, जिल्ला अध्यक्ष पद रिक्त रहेका १३ जिल्लामा सम्बन्धित जिल्ला तहकै निर्णयबाट अध्यक्ष चयन गरी संगठन कमिटीमा रूपान्तरण गर्ने र अनुमोदनका लागि माथिल्लो कमिटीमा पठाउने निर्णय गरिएको छ। बैठकले केन्द्रीय कमिटी सदस्यमा सिर्जना राई (भोजपुर), सावित्रा अर्याल (रुपन्देही), इन्दु कडरिया विष्ट (कञ्चनपुर), सीता पंगेनी (नवलपुर), सीता अधिकारी (पाल्पा), डा. पुष्पा केसी भण्डारी (कास्की), धर्मनाथ प्रसाद साह (सिरहा), तेजमान कन्दङवा (तेह्रथुम), टंक आङ्बोहाङ (ताप्लेजुङ), नवीन रोक्का (रोल्पा), मीनप्रसाद गुरुङ (स्याङ्जा), डवल पाण्डे (दोलखा) र तेजेन्द्र केसी (रुपन्देही) लाई मनोनयन गर्ने निर्णय गरेको छ।

बैठकको प्रारम्भमा पार्टीको केन्द्रीय कमिटीको तेस्रो बैठकबाट वरिष्ठ नेतामा मनोनीत विद्यादेवी भण्डारीले पद तथा गोपनीयताको शपथ ग्रहण गरेकी थिइन्। एमालेको प्रेस वक्तव्यमा केन्द्रीय सदस्यमा १० जनालाई मनोनयन गरिएको उल्लेख भए पनि नाम भने १३ जनाको सूचीमा छ। त्यसैले मनोनीत सदस्यको आधिकारिक संख्या पुष्टि गरेर समाचार प्रकाशन गर्नु उपयुक्त हुनेछ।