रियाद अन्तर्राष्ट्रिय विमानस्थलमा क्षेप्यास्त्र आक्रमण, १२ जनाको मृत्यु, ३०९ घाइते

२५ असाेज,काठमाडौं । साउदी अरबको राजधानी रियादस्थित किङ खालिद अन्तर्राष्ट्रिय विमानस्थलमा शनिबार भएको क्षेप्यास्त्र आक्रमणमा परी १२ जनाको मृत्यु भएको छ भने ३०९ जना घाइते भएका छन्।

 घाइतेमध्ये केहीको अवस्था गम्भीर रहेको छ। साउदी अरबको नागरिक उड्डयन प्राधिकरणका अनुसार मृत्यु हुनेमा चार जना साउदी नागरिक, दुई जना बंगलादेशी तथा अमेरिका, प्यालेस्टाइन, इजिप्ट, जोर्डन, सिरिया र सुडानका एक–एक जना नागरिक रहेका छन्।

 आक्रमणबाट विमानस्थलको यात्रु टर्मिनलमा क्षति पुगेको छ। घाइतेहरूलाई एम्बुलेन्स तथा हेलिकोप्टरमार्फत विभिन्न अस्पतालमा पुर्‍याइएको थियो। घाइतेहरूको अस्पतालमा उपचार भइरहेको छ भने विमानस्थलमा भएको भौतिक क्षतिको मूल्यांकन जारी रहेको छ।

 आक्रमणपछि विमानस्थलको सञ्चालन अस्थायी रूपमा स्थगित गरिएको थियो। सुरक्षा जाँच तथा क्षतिको मूल्यांकनका लागि उडानहरू अन्यत्र मोड्ने र रद्द गर्ने निर्णय गरिएको थियो। यसका कारण रियाद आउने र रियादबाट अन्य गन्तव्यमा जाने यात्रुहरू प्रभावित भएका छन्।

उडानसम्बन्धी विवरणअनुसार आक्रमणपछि ठूलो संख्यामा उडान रद्द तथा ढिलाइ भएका छन्। यद्यपि, पछिल्लो २४ घण्टामा २२५ उडान रद्द भएको दाबीको स्वतन्त्र पुष्टि हुन सकेको छैन। पछिल्लो समय यमनका हुथी विद्रोही र साउदी अरबको समर्थन प्राप्त यमनी सरकारी पक्षबीचको द्वन्द्व चर्किएसँगै साउदी अरबका नागरिक उड्डयन पूर्वाधारलाई लक्षित गरी आक्रमणका घटना बढेका छन्।

 रियादस्थित विमानस्थलमा यसअघि पनि आक्रमण भएका थिए। ती घटनामा समेत मानवीय क्षति भएको थियो। शनिबारको आक्रमणको जिम्मेवारी हुथी विद्रोहीले तत्काल स्वीकार गरेका छैनन्। यद्यपि, साउदी नेतृत्वको गठबन्धनले आक्रमणमा हुथी विद्रोही संलग्न रहेको आरोप लगाउँदै जवाफी कारबाही गर्ने चेतावनी दिएको छ।