२७ साउन,बारा । नेपाल पत्रकार महासंघ, मधेश प्रदेशका पदाधिकारी र सदस्यमाथि कानून व्यवसायीहरूको समूहले गरेको आक्रमणको प्रेस चौतारी नेपाल, मधेश प्रदेश समितिका महासचिव दिवाकर भण्डारीले आज एक बिज्ञ्पति प्रकाशित गरि कडा शब्दमा निन्दा गरेको छ।
साउन २७ गते जनकपुरधाममा नेपाल बार एसोसिएसन, धनुषाको नेतृत्वमा कानून व्यवसायीहरूको समूहले महासंघका पदाधिकारी र पत्रकारहरूमाथि आक्रमण गरेको थियो। यो घटना गुठी संस्थानबाट महासंघले २० वर्षका लागि लिजमा लिएको चार कठ्ठा जग्गालाई तारबार लगाउने क्रममा भएको थियो।
यस आक्रमणमा परी घाइते हुनुभएका महासंघका अध्यक्ष श्याम बञ्जारा, उपाध्यक्ष ज्योति झा, महासचिव शैलेन्द्र महतो (क्रान्ति) लगायत पत्रकार दिवाकर राय, अनिलकुमार निराला र विनिता यादवको शीघ्र स्वास्थ्यलाभको कामना गर्दै प्रेस चौतारीले उहाँहरूको उपचारका लागि आवश्यक सहयोग गर्न नेपाल सरकार, मधेश प्रदेश सरकार र स्थानीय प्रशासनसँग जोडदार माग गरेको छ।
प्रेस विज्ञप्तिमा गुठी संस्थानबाट सबै कानूनी प्रक्रिया पूरा गरेर लिज सम्झौता भएको जग्गा कब्जा गर्ने उद्देश्यले गरिएको यो आक्रमणलाई ‘कानुनविपरीतको कार्य’ भनिएको छ। प्रेस चौतारीले उक्त घटनाको निष्पक्ष छानबिन गरी आक्रमणमा संलग्न कानून व्यवसायीहरूलाई कानूनी दायरामा ल्याउन पनि माग गरेको छ।
साथै, आठवटै जिल्लाका पत्रकारहरूका लागि प्रादेशिक कार्यालय बनाउने तयारी भइरहेको सो जग्गामा कुनै पनि प्रकारको अवरोध नगर्न पनि प्रेस चौतारीले सबै सरोकारवाला निकायसँग हार्दिक अपिल गरेको छ।
प्रतिक्रिया दिनुहोस् !