२७ साउन,बारा । नेपाल पत्रकार महासंघ केन्द्रीय समितिले धनुषास्थित नेपाल पत्रकार महासंघ, मधेस प्रदेश समितिको कार्यालय भवन निर्माणस्थलको जग्गा विवादलाई लिएर पत्रकारहरूमाथि भएको बर्बर आक्रमणको कडा शब्दमा निन्दा गरेको छ।
महासंघले आज एक प्रेस विज्ञप्ति जारी गर्दै आक्रमणमा संलग्नलाई तत्काल कानुनको दायरामा ल्याउन र घाइते पत्रकारहरूको उपचारको सम्पूर्ण व्यवस्था मिलाउन सम्बन्धित निकायसँग जोडदार माग गरेको छ।
महासंघका अनुसार, धनुषाको जनकपुरधाम उपमहानगरपालिका, श्रीराम मन्दिर गुठीको जग्गा महासंघले २० वर्षका लागि लिजमा लिएको थियो। तर, सोही जग्गामा नेपाल बार एशोसिएसन, धनुषाले आफ्नो हक लाग्ने भन्दै कब्जा गर्ने प्रयास गरेको महासंघले जनाएको छ।
महासंघले यसरी जग्गा कब्जा गर्ने प्रयास गर्नु शोभनीय नभएको बताएको छ।
गत साउन २७ गते महासंघको प्रदेश समितिले जग्गा संरक्षणका लागि तारले घेराबार गरिरहेको बेला बारका जिल्ला अध्यक्ष विमल मिश्रको नेतृत्वमा आएको एक समूहले महासंघका पदाधिकारी र पत्रकारहरूमाथि आक्रमण गरेको विज्ञप्तिमा उल्लेख छ।
यस आक्रमणमा महासंघका मधेस प्रदेश अध्यक्ष श्याम बन्जारा, उपाध्यक्ष ज्योती झा, महासचिव शैलेन्द्र क्रान्ति, पत्रकार दिवाकर साह र विनिता यादव लगायत घाइते भएका छन्। आक्रमणबाट महासचिव क्रान्तिको खुट्टा भाँचिएको छ भने पत्रकार साहको टाउकोमा गम्भीर चोट लागेको छ। महासंघले घाइते पत्रकारहरूको शीघ्र स्वास्थ्य लाभको कामना गरेको छ।
“अदालत हाम्रो गोजीमा छ, हामी जे भन्छौँ त्यही हुन्छ” भन्दै पत्रकारमाथि भएको यो आक्रमण प्रेस स्वतन्त्रतामाथिको ठाडो हस्तक्षेप भएको महासंघको ठहर छ। महासंघका महासचिव रामप्रसाद दाहालद्वारा हस्ताक्षरित विज्ञप्तिमा यस प्रकारको घटना भविष्यमा दोहोरिन नदिन सरकारले विशेष प्रबन्ध मिलाउनुपर्ने माग गरिएको छ।
प्रतिक्रिया दिनुहोस् !