८ असाेज,काठमाण्डाै । भारतकाे लद्दाखमा छुट्टै राज्यको माग गर्दै भएको प्रदर्शनले हिंसात्मक रूप लिएको छ।
लद्दाखलाई पूर्ण राज्यको दर्जा दिन र भारतीय संविधानको छैटौँ अनुसूचीमा समावेश गर्नुपर्ने माग राख्दै सडकमा उत्रिएका प्रदर्शनकारी र प्रहरीबीच झडप हुँदा कम्तीमा चार जनाको मृत्यु भएको छ भने ७० भन्दा बढी घाइते भएका छन्।
आक्रोशित प्रदर्शनकारीले सत्तारुढ भारतीय जनता पार्टी (भाजपा) को कार्यालयमा आगजनी गर्नुका साथै गाडी तोडफोड गरेका छन्। हिंसा नियन्त्रणमा लिन प्रहरीले अश्रुग्यास र लाठीचार्जको प्रयोग गरेको छ।
सन् २०१९ मा जम्मू कश्मीरबाट छुट्टिएर केन्द्रशासित प्रदेश बनेपछि लद्दाखका बासिन्दाले राजनीतिक अधिकार खोसिएको भन्दै असन्तुष्टि जनाउँदै आएका छन्। उनीहरूको माग छैटौँ अनुसूचीमा समावेश भएपछि भूमि, रोजगारी र संस्कृतिमा विशेष अधिकार प्राप्त हुनेछ, जसले बाह्य जनसंख्याको प्रवेश र त्यसबाट आउन सक्ने खतरालाई रोक्नेछ।
यद्यपि, पटकपटकको आन्दोलनपछि पनि केन्द्र सरकारले उनीहरूको मागमा कुनै सम्बोधन गरेको छैन। घटनापछि जम्मू कश्मीरका पूर्वमुख्यमन्त्री महबुबा मुफ्तीले केन्द्र सरकारलाई जनताको असन्तोषको कारणबारे इमानदारीपूर्वक मूल्याङ्कन गर्न आग्रह गरेकी छन्।
प्रतिक्रिया दिनुहोस् !