१३ कार्तिक,काठमाण्डाै । अस्ट्रेलियामा एक १७ वर्षीय युवा क्रिकेट खेलाडी बेन अष्टिनको मेलबर्नमा अभ्यासका क्रममा चोट लागेर दुःखद निधन भएको छ।
बुधबार उनको अस्पतालमा उपचारको क्रममा मृत्यु भएको हो। मंगलबार फेर्नट्री गलीस्थित क्रिकेट नेटमा अभ्यास गरिरहेको बेला स्वचालित बलिङ मेसिनबाट फ्याँकिएको बलले उनको टाउको र घाँटीमा गम्भीर चोट लागेको थियो।
चोट लाग्ने समयमा उनले हेलमेट पनि लगाएका थिए। मंगलबार चोट लागेपछि तुरुन्तै आपतकालीन सेवा बोलाएर उनलाई अस्पताल पुर्याइएको थियो, जहाँ लाइफ सपोर्ट सिस्टममा राखिएकै अवस्थामा बुधबार उनको मृत्यु भएको बीबीसीले जनाएको छ।
फेर्नट्री गली क्रिकेट क्लबले आफ्ना एक खेलाडीको दुःखद निधनमा क्लब पूर्ण रूपमा विक्षिप्त भएको बताएको छ। क्लबले बेनलाई ‘एक प्रतिभाशाली र सबैका मनपर्ने खेलाडी’ भनेको छ।
फेर्नट्री गली एन्ड डिस्ट्रिक्ट क्रिकेट एसोसिएसनका अध्यक्ष आर्नी वाल्टर्सले बेन ‘स्थानीय क्रिकेटमा प्रतिभाशाली र लोकप्रिय दुवै’ रहेको प्रतिक्रिया दिए। उनले भने, ‘यो खबरले हाम्रो समुदायमा कति गहिरो असर पार्छ भन्ने मलाई थाहा छ र हामी हाम्रा क्लबहरू र क्रिकेट परिवारलाई हर प्रकारको सहयोग प्रदान गर्नेछौं।’
स्मरण रहोस्, यो घटना अस्ट्रेलियाका क्रिकेटर फिलिप ह्युजको मृत्यु भएको एक दशकपछि आएको हो। उनको सन् २०१४ मा सेफिल्ड शिल्डमा ब्याटिङ गरिरहेका बेला घाँटीमा बलले लागेर मृत्यु भएको थियो। उक्त घटनामा कोही पनि दोषी नरहेको ठहर गरिएपछि यस खेलमा सुरक्षा उपकरणहरूमा सुधार ल्याइएको थियो।
प्रतिक्रिया दिनुहोस् !