१३ कार्तिक,रूपन्द्ही । नेकपा एमाले निकट मजदुर संगठन जिफन्ट (नेपाल ट्रेड युनियन महासंघ) का केन्द्रीय उपाध्यक्ष तथा नेकपा एमालेका केन्द्रीय सदस्य कमल गौतम को दुःखद निधन भएको छ।
६५ वर्षीय गौतमको निधन भैरहवास्थित विद्युत् प्राधिकरणको कार्यालय अगाडि भएको एक विरोध प्रदर्शनका क्रममा भएको हो। बुटवल–भैरहवा कोरिडोरका १० उद्योगमा नेपाल विद्युत् प्राधिकरणले ट्रंकलाइन प्रयोग गरेको भन्दै लाइन काटेको विरोधमा उद्योगीका संस्था र मजदुरले संयुक्त रूपमा आयोजना गरेको विरोध प्रदर्शनमा मजदुरहरूको तर्फबाट वक्ताका रूपमा सहभागी भएका गौतम भाषण गर्दागर्दै बेहोस भएर ढलेका थिए।
उनलाई तत्कालै थप उपचारका लागि मणिग्रामस्थित क्रिमसन अस्पताल पुर्याइएकोमा चिकित्सकहरूले मृत घोषणा गरेको अस्पतालका जनसम्पर्क अधिकृत चन्द्रकान्त बस्यालले जानकारी दिए।
चिकित्सकले चेकजाँच गर्दा गौतमको मृत्युको कारण हृदयघात भएको पुष्टि भएको बस्यालले बताए। बुटवल उपमहानगरपालिका–३ ज्योतिनगरका स्थायी बासिन्दा गौतम २०५४ सालदेखि पार्टी र जिफन्टमा सक्रिय थिए। उनको परिवारमा दुई छोरा र श्रीमती रहेका छन्।
प्रतिक्रिया दिनुहोस् !