२४ असाेज,बारा । सहकारी संस्था लिमिटेड मनहर्वाको २३औं वार्षिक साधारणसभा शुक्रबार कलैया उपमहानगरपालिका-२ स्थित अमर माध्यमिक विद्यालय परिसरमा सम्पन्न भएको छ।
साना किसान कृषि सहकारी संघ लि. बाराका अध्यक्ष मिश्रिलाल सहनीले उद्घाटन गर्नुभएको सभामा उहाँले सहकारी संस्थाहरूले ग्रामीण अर्थतन्त्रमा ‘मुटु’को भूमिका खेलेको भन्दै सचेत भएर कारोबार गर्न र कर्जा नतिर्नेहरूबाट जोगिन आग्रह गर्नुभयो।
कार्यक्रममा साना किसान विकास लघुवित्त वित्तीय संस्था लि. हेटौंडाका प्रमुख भोलानाथ रेग्मीले साना किसान अभियानले सहुलियत कर्जा, महिला सशक्तीकरण र आयआर्जनमा टेवा पुर्याउँदै सफल काम गरिरहेको बताउनुभयो।
संस्थाका अध्यक्ष नयनकला खड्काले जानकारी गराउनुभएअनुसार, ३ हजार ८ महिला सदस्य रहेको संस्थाको सभाले सदस्यहरूलाई १४ प्रतिशतका दरले शेयर बोनस वितरण गर्ने, योगदानका आधारमा संरक्षित पूँजी फिर्ता गर्ने, अडिटर नियुक्त गर्ने र हरैयामा रहेको सहकारी एकीकरण लगायत १५ भन्दा बढी महत्वपूर्ण निर्णय गरेको छ।
यस अवसरमा संस्थाले उत्कृष्ट बचतकर्ता, असल ऋणी, दुग्ध उत्पादक, कृषि सामग्री खरिदकर्ता, पूर्व सञ्चालक लगायत २५ जनालाई सम्मान गरेको र संस्थाले दुग्ध संकलन, पशुसुरक्षण, महिला लक्षित तालिमसहित कृषि सामग्री बिक्री कक्ष समेत सञ्चालन गर्दै आएको जानकारी दिइयो।
प्रतिक्रिया दिनुहोस् !