२७ भदाै,काठमाडौं । नेपाल यातायात व्यवसायी राष्ट्रिय महासंघले देशभरका आफ्ना सदस्य संघ, समिति, कम्पनी, प्रा.लि.का पदाधिकारीलाई नजिकिँदै गरेको हिन्दुहरूको महान चाड दसैं, तिहार लगायतका पर्वमा सार्वजनिक यातायात सेवा सञ्चालन गर्न आग्रह गरेको छ।
महासंघका महासचिव डेक नाथ गौतमले एक विज्ञप्ति जारी गर्दै विषम परिस्थिति क्रमशः सुधार हुँदै गएकाले आम उपभोक्ताको हितलाई ध्यानमा राखेर सेवा सुचारु गर्न अनुरोध गरेका हुन्।
विज्ञप्तिमा भनिएको छ, ‘नजिकिँदै गरेका महान चाडपर्वमा यातायात सेवा प्रदान गर्नु हाम्रो कर्तव्य हो। त्यसैले, आ-आफ्नो क्षेत्रमा रहेका स्थानीय प्रशासन र सुरक्षा समितिसँग समन्वय गरी यातायात सेवा सुचारु गरेर आम उपभोक्तालाई सेवा प्रदान गर्न अनुरोध गरिन्छ।’
यस आग्रहले लामो समयदेखि अवरुद्ध रहेको यातायात सेवा सुचारु भई चाडपर्वका बेला घर जाने यात्रुहरूलाई सहज हुने विश्वास गरिएको छ। महासंघले सुरक्षा समितिसँगको सहकार्यमा सुरक्षित रूपमा सेवा सञ्चालन गर्ने प्रतिबद्धता पनि व्यक्त गरेको छ।
प्रतिक्रिया दिनुहोस् !