म. आफताब आलम
बागमती ब्युराे
४ मंसिर,काठमाण्डाै । राष्ट्रिय सुरक्षा परिषद्को ४१ औं बैठकले फागुन २१ गते हुने प्रतिनिधिसभा निर्वाचनलाई स्वतन्त्र, निष्पक्ष र भयरहित वातावरणमा सम्पन्न गर्नका लागि नेपाली सेना परिचालन गर्न मन्त्रिपरिषद्समक्ष सिफारिस गर्ने निर्णय गरेको छ।
सिंहदरबारमा प्रधानमन्त्री सुशीला कार्कीको अध्यक्षतामा बसेको उक्त बैठकले नेपालको संविधानको धारा २६६ को उपधारा (१) बमोजिम सेना परिचालन गर्न सिफारिस गरेको हो।
साथै, बैठकले राष्ट्रिय सुरक्षा परिषद्को आठौं वार्षिक प्रतिवेदनको मस्यौदामाथि छलफल गरी आवश्यक संशोधनका साथ स्वीकृत गरेको र उक्त प्रतिवेदनलाई राष्ट्रपतिसमक्ष पेश गर्ने निर्णय भएको रक्षा मन्त्रालयका सचिव एवं परिषद्का सदस्य सचिव सुमनराज अर्यालले जानकारी दिएका छन्।
बैठकमा राष्ट्रिय सुरक्षामा आउन सक्ने विविध चुनौतीहरू तथा राष्ट्रिय र अन्तर्राष्ट्रिय स्तरमा देखापरेका घटनाक्रमले राष्ट्रिय सुरक्षामा पार्न सक्ने प्रभाव तथा चुनौतीहरू र अपनाउनुपर्ने भावी रणनीतिका सम्बन्धमा समेत छलफल भएको परिषद् सचिवालयले जनाएको छ।
बैठकमा अर्थमन्त्री रामेश्वर खनाल, गृहमन्त्री ओमप्रकाश अर्याल, मुख्यसचिव एकनारायण अर्याल, प्रधान सेनापति अशोकराज सिग्देललगायतको उपस्थिति थियो।
प्रतिक्रिया दिनुहोस् !