ईर्साद अन्सारी
२८ असोज,बारा । वीरगञ्जका सुन व्यवसायी अभिषेक सर्राफको माईस्थानस्थित घरमा सोमबार राजस्व अनुसन्धान कार्यालय पथलैया, सशस्त्र प्रहरी र भन्सार कार्यालयको संयुक्त टोलीले छापा मार्दा ठूलो मात्रामा स्रोत नखुलेको सुन, चाँदीका गहना, बहुमूल्य वस्तु र कारोबारसँग सम्बन्धित कागजात बरामद भएको छ ।
वीरगञ्ज महानगरपालिका-८ मा रहेको अभिषेक ज्वेलर्सका सञ्चालक सर्राफलाई राजस्व चुहावटको आशंकामा नियन्त्रणमा लिई उनको घर, कारोबार स्थल र गोदाममा खानतलासी गरिएको हो ।
प्रमुख अनुसन्धान अधिकृत हरिप्रसाद शर्माका अनुसार कारोबारका खाता र अन्य प्रमाणहरू समेत कब्जामा लिइएको छ । बरामद सामग्री हाल सुनचाँदी व्यवसायी संघको कार्यालयमा तौल तथा कानूनी प्रक्रियाका लागि पठाइएको छ भने यो घटनाले वीरगञ्जका अन्य सुन व्यवसायीहरूमा हलचल मच्चाएको छ ।
यसैबीच, केही व्यवसायीहरूले ‘घरमा सामग्री राख्दैमा अनुसन्धान गर्नु अनुचित’ भन्दै छापाको विरोधमा नाराबाजी गरेका छन् । तर, राजस्व अनुसन्धान कार्यालयले यो कार्य कानूनी प्रक्रिया अनुसार भएको र थप अनुसन्धान जारी रहेको जनाएको छ ।
प्रतिक्रिया दिनुहोस् !