२५ चैत,काठमाण्डाैं । अमेरिका र इरानबीच बढ्दो सैन्य तनावका बीच अमेरिकी राष्ट्रपति डोनाल्ड ट्रम्पले दुई साताका लागि सैन्य कारबाही स्थगित गर्ने घोषणा गरेसँगै विश्व राजनीतिमा अस्थायी राहतको संकेत देखिएको छ।
ट्रम्पले सामाजिक सञ्जाल ट्रुथ सोसलमार्फत इजरायल पनि आक्रमण रोक्न सहमत भएको र यो कदम व्यापक युद्धविरामतर्फको प्रारम्भिक चरण भएको उल्लेख गरेका छन्।
पाकिस्तानका प्रधानमन्त्री शहबाज शरीफ र सेना प्रमुख असिम मुनिरको आग्रह एवं छलफलपछि लिइएको यो निर्णयसँगै इरानले सामरिक महत्त्वको स्ट्रेट अफ होर्मुज जलमार्ग पुनः खोल्नुपर्ने सर्त राखिएको छ।
इरानबाट प्राप्त १० बुँदे शान्ति प्रस्तावलाई वार्ताको आधार मान्दै ट्रम्पले अमेरिकी सैन्य लक्ष्य पूरा भइसकेको दाबी गरेका छन् भने ह्वाइट हाउसकी प्रेस सचिव क्यारोलिन लेभिटले पनि कूटनीतिक संवाद अघि बढ्ने पुष्टि गरेकी छन्।
दुई साताको यो समयसीमाभित्र पाकिस्तानमा हुने भनिएको वार्ताले दीर्घकालीन शान्ति सम्झौताको मार्ग प्रशस्त गर्ने अपेक्षा गरिए पनि यसको ठोस परिणामबारे अन्तर्राष्ट्रिय समुदायले निकै चासोका साथ नियालिरहेको छ।
