बिकेन्द्र सुबेदी
५ मंसिर,काठमाण्डाैं । नेकपा (एमाले) ले पार्टीमा नीति र नेतृत्वको सुरक्षाका लागि नेशनल भोलेन्टियर फोर्स (NVF) को घोषणा गर्दैछ ।
आज बिहान ११ बजे अध्यक्ष केपी शर्मा ओलीले बबरमहलको कार्की ब्यांक्वेटमा एक घोषणा सभा मार्फत यस फोर्सको सार्वजनिक गर्ने कार्यक्रम छ । यसअघि, माइतीघर मण्डलामा युवाहरू भेला भएर बानेश्वरसम्म मार्चपास गर्ने तय भएको छ ।
पार्टीको जनसंगठन संयन्त्रका प्रमुख भानुभक्त ढकालका अनुसार समाजमा बढेको असुरक्षा, अशान्ति र भदौ २३/२४ को घटनापछि आम मानिसहरूको खस्किएको मनोबल उठाउन NVF घोषणा गर्न लागिएको हो ।
फोर्सको मुख्य उद्देश्यहरूमा राज्यका निकायलाई सहयोग गर्ने, जनतालाई भय र असुरक्षाबाट मुक्त गर्ने, सुरक्षा निकायलाई सहयोग गर्ने, र प्राकृतिक प्रकोप भएका बेला राहात तथा उद्धारमा सहयोग गर्ने रहेका छन् ।
सुरक्षा संवेदनशीलता बढेका बेला राज्यले अध्यक्ष ओली लगायत नेताहरूका सुरक्षाकर्मी फिर्ता लगेकोले पनि यो फोर्सको आवश्यकता महसुस भएको एमालेले जनाएको छ । ढकालले NVF को प्रदेश र जिल्लागत संरचना पनि तत्काल विस्तार गरिने जानकारी दिएका छन्, जसमा एक जना कमाण्डर र दुई जना सहायक कमाण्डरको व्यवस्था गरिएको छ ।
प्रतिक्रिया दिनुहोस् !