१८ बैसाख,बारा । ‘स्वस्ति न इन्द्रो वृद्धश्रवाः स्वस्ति नः पूषा विश्ववेदाः’ अर्थात् सबैको कल्याण होस् भन्ने पावन वैदिक मन्त्रोच्चारण र धार्मिक विधि-विधानका बीच बारा जिल्लामा ब्राह्मण समाज नेपालको भवन निर्माण कार्यको आज भव्य शिलान्यास गरिएको छ।
मधेस प्रदेश सरकारको भौतिक पूर्वाधार मन्त्रालयद्वारा विनियोजित बजेटबाट निर्माण हुन लागेको यस भवनको शिलान्यास गर्दै जिल्ला अध्यक्ष अनिल पाण्डेयले “भवन मात्र भौतिक संरचना नभई यो हाम्रो संस्कार, संस्कृति र संगठनात्मक पहिचानको धरोहर हुने” विश्वास व्यक्त गरे ।
“परोपकाराय पुण्याय” भन्ने शास्त्रीय मान्यतालाई आत्मसात गर्दै निर्माण गरिने यस भवनले आगामी दिनमा समाजका बैठक, सांस्कृतिक विमर्श र सामाजिक गतिविधिहरूलाई एउटै छानोमुनि व्यवस्थित गर्ने मात्र नभई, समुदायबीच एकता, सहकार्य र सेवाभावलाई अझ प्रगाढ बनाउने अपेक्षा गरिएको छ।
कार्यक्रममा सहभागीहरूले यस गौरवपूर्ण योजनालाई बारा जिल्लाकै ब्राह्मण समुदायको उज्ज्वल भविष्य र सामाजिक सुदृढीकरणतर्फको एक ऐतिहासिक पाइलाका रूपमा चित्रण गर्दै सफल कार्यान्वयनका लागि ऐक्यवद्धता जनाएका थिए।
