१४ बैसाख,काठमाण्डाैं । पश्चिमी अफ्रिकी मुलुक मालीमा शनिबार सशस्त्र समूहले राजधानी बामाकोसहित देशका विभिन्न स्थानमा गरेको समन्वित आक्रमणमा परी प्रभावशाली रक्षामन्त्री सादियो कमाराको मृत्यु भएको छ।
राजधानीबाट १५ किलोमिटर टाढा रहेको कातीस्थित कमाराको निवासमा आत्मघाती आक्रमणकारीले विस्फोटक पदार्थ भरिएको सवारीसाधन ठोक्काएर गराएको विस्फोटमा गम्भीर घाइते भएका उनको उपचारका क्रममा आइतबार मृत्यु भएको हो।
अलकायदासँग आबद्ध जमात नुसरत अल-इस्लाम वल मुस्लिमिन र तुआरेग अलगाववादी समूह आजावाद लिबरेशन फ्रन्टले गरेको यस भीषण आक्रमणमा कमाराका परिवारका सदस्य र केही सर्वसाधारणको समेत ज्यान गएको छ भने विद्रोहीहरूले उत्तरी रणनीतिक सहर किदाल कब्जा गरेको दाबी गरेका छन्।
सन् २०२० र २०२१ को सैन्य ‘कू’ पछि सत्ताको मुख्य स्तम्भका रूपमा रहेका र रूससँगको सैन्य सम्बन्ध विस्तारमा प्रमुख भूमिका खेलेका कमाराको मृत्युलाई असिमी गोइता नेतृत्वको सैन्य सरकार र रुसी रणनीति दुवैका लागि ठूलो धक्का मानिएको छ। संयुक्त राष्ट्रसंघ, अफ्रिकी संघ र इकोवासले यो हिंसाको निन्दा गरिरहँदा, पछिल्लो आक्रमणले मालीको सुरक्षा सुधार गर्ने सैन्य सरकारको बाचामाथि गम्भीर प्रश्न उठाउँदै क्षेत्रीय स्थायित्वमा थप चुनौती थपेको छ।
