१४ चैत,काठमाण्डाैं । नेपाली कांग्रेसको देउवा समूहले नेकपा एमालेका अध्यक्ष एवं पूर्वप्रधानमन्त्री केपी शर्मा ओली र कांग्रेस नेता एवं पूर्वगृहमन्त्री रमेश लेखक पक्राउ परेको घटनालाई ‘राजनीतिक प्रतिशोध’ को संज्ञा दिँदै यसको संवैधानिक, कानुनी र राजनीतिक रूपमा सशक्त प्रतिवाद गर्ने निर्णय गरेको छ।
शनिबार ठमेलस्थित रमादा होटलमा बसेको देउवा पक्षीय शीर्ष नेताहरूको बैठकले सरकारको यस कदमले संविधान र लोकतन्त्रप्रतिको प्रतिबद्धता कमजोर पारेको ठहर गरेको हो।
बैठकपछि कार्यवाहक सभापतिको हैसियतमा विज्ञप्ति जारी गर्दै पूर्णबहादुर खड्काले आयोगको प्रतिवेदन कार्यान्वयनका नाममा कुनै प्रक्रिया पूरा नगरी तत्कालीन सरकारका पदाधिकारीहरूलाई पक्राउ गर्नु कानुनी राज्यको उपहास भएको बताए । विज्ञप्तिमा भनिएको छ, “सरकार गठन भएलगत्तै दुराशयपूर्ण तवरबाट भएको यस राजनीतिक प्रतिशोधले सरकार लोकतन्त्रबाट पछाडि हटेको देखिन्छ; यसको सामना गर्न देशभरका पार्टी कार्यकर्ताहरू तयारी अवस्थामा रहन हार्दिक अपिल गर्दछौँ।”
कांग्रेसले उक्त छानबिन प्रतिवेदन नै पक्षपातपूर्ण रहेको दाबी समेत गरेको छ। भाद्र २३ र २४ गतेका घटनाहरूको निष्पक्ष छानबिन हुनुपर्नेमा २४ गते भएको मानवीय क्षति, सरकारी संरचना र निजी सम्पत्तिको नोक्सानीबारे प्रतिवेदन मौन रहनुले सरकारको पूर्वाग्रह प्रष्ट पारेको खड्काको तर्क छ।
प्रतिवेदनको पेज नं ७२१ को सिफारिसलाई आधार बनाएर अनुसन्धान र अभियोजनको प्रक्रिया मिच्दै गरिएको पक्राउको विरुद्धमा कांग्रेसले अब रणनीति बनाएर अघि बढ्ने स्पष्ट पारेको छ।
