९ चैत, काठमाडौं । अमेरिकी राष्ट्रपति डोनाल्ड ट्रम्पले विगत दुई दिनमा अमेरिका र इरानबीच भएको वार्ता फलदायी बनेको उल्लेख गर्दै इरानको ऊर्जा पूर्वाधार लक्षित सैन्य आक्रमणहरू पाँच दिनका लागि रोक्ने निर्णय गरेका छन्।
सामाजिक सञ्जाल ‘ट्रुथ सोसल’ मा सबै ठूला अक्षरमा पोस्ट गर्दै ट्रम्पले मध्यपूर्वका शत्रुताहरूको पूर्ण र समग्र समाधानका सम्बन्धमा दुई देशबीच गहन, विस्तृत र रचनात्मक कुराकानी भएको जानकारी दिएका हुन्।
’अपरेशन एपिक फ्युरी’ सुरु भएयताकै सबैभन्दा मेलमिलापपूर्ण मानिएको यस सन्देशमा ट्रम्पले जारी छलफलको सफलतामा निर्भर रहने गरी युद्ध विभागलाई आगामी पाँच दिनका लागि इरानी ऊर्जा केन्द्रहरू विरुद्धका सबै आक्रमण स्थगित गर्न निर्देशन दिएको बताएका छन्।
यसअघि इरानलाई होर्मुज स्ट्रेट पुनः खोल्न ट्रम्पले दिएको समयसीमा आजै सकिँदै थियो भने इरानको राष्ट्रिय रक्षा परिषद्ले आफ्नो तट वा टापुमा आक्रमण भए फारसको खाडीका सञ्चार लाइनहरूमा माइन बिछ्याउने चेतावनी दिएको थियो।
ट्रम्पको यो सकारात्मक घोषणासँगै विश्व बजारमा उत्साह देखिएको छ; कच्चा तेलको मूल्य १३ प्रतिशतले घटेर प्रति ब्यारेल ९६ डलर पुगेको छ भने ग्यासको मूल्य र बेलायतको १० वर्षे सरकारी बन्डको प्रतिफल (यिल्ड) मा समेत उल्लेख्य गिरावट आएको छ।
