२६ माघ,काठमाण्डाैं । जापानमा आइतबार सम्पन्न संसदको तल्लो सदनको निर्वाचनमा सानाए ताकाइचीको नेतृत्वमा रहेको लिबरल डेमोक्रेटिक पार्टी (एलडीपी) ले ४६५ मध्ये ३१६ सिट जित्दै अत्यधिक बहुमत हासिल गरेको छ।
पूर्व प्रधानमन्त्री शिन्जो आबेकी निकट सहयोगी तथा ‘आइरन लेडी’ उपनामले चिनिने ६४ वर्षीया ताकाइची, जो राजनीतिमा आउनुअघि टेलिभिजन प्रस्तोता र हेभी मेटल संगीतकी सौखिन थिइन्, अब पाँच वर्षमा जापानको चौथो प्रधानमन्त्री बनेकी छिन्।
स्पष्ट बहुमतसँगै उनले जिम्मेवार वित्तीय नीति र आवश्यक लगानी सुनिश्चित गर्ने प्रतिबद्धता जनाएकी छिन् भने निर्वाचनका क्रममा उनले महँगी नियन्त्रण गर्न खाद्यान्नमा लाग्ने ८ प्रतिशत बिक्री कर निलम्बन गर्ने लोकप्रिय एजेन्डा अघि सारेकी थिइन्।
ताकाइचीको यो जितलाई अमेरिकी राष्ट्रपति डोनाल्ड ट्रम्प र अर्थमन्त्री स्कट बेसेन्टले पूर्ण समर्थनसहित स्वागत गरे पनि चीनका लागि भने यो परिणाम तनावपूर्ण बनेको छ, विशेष गरी ताइवान मामिलामा उनको कडा अडानका कारण बेइजिङ सशंकित देखिएको छ।
प्राध्यापक क्रेग मार्कका अनुसार यो बहुमतले ताकाइचीलाई रक्षा खर्च बढाउन र जापानको दशकौँ पुरानो शान्तिवादी सैन्य छविलाई परिवर्तन गर्ने ऐतिहासिक अवसर दिएको छ, जसलाई जापानको व्यावसायिक क्षेत्रले राजनीतिक स्थिरताको संकेतका रूपमा स्वागत गरेको छ।
