१० जेठ,काठमाण्डाैं । नेपालस्थित चिनियाँ दूतावासले नेपाली सामाजिक सञ्जाल र केही सञ्चारमाध्यममा फैलिएको “चिनियाँ नागरिकले नेपाली पत्रकारलाई घुस दिन खोजेको” भन्ने आरोपप्रति आफ्नो गम्भीर ध्यानाकर्षण भएको जनाउँदै त्यसलाई “पूर्ण रूपमा अस्वीकार” मात्र गरेको छैन, बल्कि यसलाई चीनविरुद्धको नियोजित बदनाम अभियानको संज्ञा समेत दिएको छ।
जनआस्था मिडियाको कार्यालयमा एक मास्कधारी युवतीले एक बोतल मदिरा र ५० हजार रुपैयाँ नगद छाडेको शंकास्पद घटना सार्वजनिक भएपछि सुरु भएको यस विवादमा दूतावासका प्रवक्ताले चीनको स्थापित परराष्ट्र नीति सम्झाउँदै आफूहरूले सधैं अन्य देशको आन्तरिक मामिलामा गैर-हस्तक्षेपको नीति अवलम्बन गरेको र नेपालको राष्ट्रिय स्वतन्त्रता, सार्वभौमसत्ता एवं भौगोलिक अखण्डताको निरन्तर समर्थन गरेको दाबी गरेका छन्।
यस संवेदनशील विषयमा दूतावासले केवल बचाउ मात्र नगरी नेपालका सम्बन्धित निकायहरूसँग यस हल्ला र अफवाहको पछाडि रहेका दोषी तथा योजनाकारहरूमाथि नेपाली कानुनअनुसार कडा, गम्भीर र निष्पक्ष अनुसन्धान गर्न माग गर्दै नेपालसँगको कानुन कार्यान्वयन र सुरक्षा सहकार्यलाई अझ सुदृढ बनाउन चीन तयार रहेको स्पष्ट पारेको छ।
अर्कोतर्फ, घटनाको केन्द्रमा रहेको जनआस्थाका प्रधानसम्पादक किशोर श्रेष्ठले उक्त नमागेको उपहार र शंकास्पद गतिविधिको स्पष्टीकरण दिँदै यसबारे प्रहरीले अनुसन्धान सुरु गरिसकेको जानकारी दिएका छन्, जसले भूराजनीतिक संवेदनशीलता बोकेको यस आरोप-प्रत्यारोपलाई सत्य र विवेकका आधारमा कानुनी किनारा लगाउनु पर्ने र नेपाल-चीन मैत्रीपूर्ण सम्बन्धमा आँच आउन नदिन दुवै पक्ष सचेत देखिनुपर्ने आवश्यकतालाई प्रस्ट पार्छ।
फाृटाे-जनआस्था
