१६ असाेज,बारा । वीरगञ्ज महानगरपालिका–१० स्थित गीता मन्दिर नजिकै मङ्गलबार राति भएको कुटपिट र हत्याकाण्डमा संलग्न पाँच जनालाई पर्सा प्रहरीले पक्राउ गरेको छ।
हत्या हुनेमा बारा जिल्लाको परवानीपुर गाउँपालिका–९ घर भई वीरगञ्ज–१० मा बस्दै आएका २० वर्षीय शिवम साह कानु (उर्फ गोल्डेन) रहेका छन्। पक्राउ पर्नेहरूमा वीरगञ्ज महानगरपालिका–२४ रामगढवाका १९ वर्षीय गौतम पटेल, २० वर्षीय सुभांकर चौरसिया, २२ वर्षीय अमीरी पटेल (करण प्रसाद पटेल), २४ वर्षीय चन्दन चौरसिया र १९ वर्षीय अमन पटवा रहेका छन्।
पर्सा प्रहरीका प्रमुख, प्रहरी उपरीक्षक (एसपी) सुदीप राज पाठकका अनुसार, मङ्गलबार राति करिब ११:३० बजे दसैँ मेला घुम्न गएका गोल्डेन र विपक्षी समूहबिच गीता मन्दिर रोडमा वादविवाद र हातपात भएको थियो।
झगडाका क्रममा ‘खुनी दरिन्दे समूह’ नामक ह्वाट्सएप ग्रुप बनाएका युवाहरूले गोल्डेनलाई हातमुक्का र बाँसको भाटाले प्रहार गरेका थिए। गम्भीर घाइते भएका गोल्डेनलाई नारायणी अस्पताल पुर्याइए पनि चिकित्सकले उनलाई मृत घोषित गरेका थिए।
प्रहरी अनुसन्धानबाट यो हत्या पुरानो रिसइवी, प्रतिशोध र आफूलाई ‘ग्याङ्स्टर’को रूपमा प्रस्तुत गर्ने उद्देश्यले भएको प्रारम्भिक निष्कर्ष निस्किएको छ। मृतक गोल्डेन र विपक्षी समूहबिच विगतमा पनि झैझगडा भएको प्रहरीले जनाएको छ।
प्रतिक्रिया दिनुहोस् !