१५ असाेज,बारा । बारा र मकवानपुरको सीमा क्षेत्र चुरियामाईको उकालोमा आज बिहान ब्रेक फेल भएको यात्रुबाहक बसले पछाडि रहेका दुई मोटरसाइकललाई ठक्कर दिँदा दुई जनाको मृत्यु भएको छ भने ६ जना घाइते भएका छन्।
बाराको जितपुर सिमरा उपमहानगरपालिका- २२ स्थित चुरियामाई मन्दिरनजिकै पथलैया–हेटौंडा सडकखण्डको उकालोमा जनकपुरबाट काठमाडौंतर्फ जाँदै गरेको ना. ७ ख ८५३७ नम्बरको बसको अचानक ब्रेक फेल भई ब्याक हुने क्रममा पछाडि रहेका दुईवटा मोटरसाइकलमा ठक्कर दिएको थियो।
दुर्घटनामा बारा, फेटा गाउँपालिका-१ का २५ वर्षीय मकेश्वर पटेल (ना. १२ प ३३६० नम्बरको मोटरसाइकल चालक) र पर्सा, वीरगञ्जका कञ्चनकुमार पटेलकी २६ वर्षीया श्रीमती कविता देवी (मधेश प्रदेश ०३-०२४ प ४४९५ नम्बरको मोटरसाइकलमा सवार) को गम्भीर घाइते अवस्थामा उपचारका लागि अस्पताल लैजाने क्रममा बाटोमै मृत्यु भएको जिल्ला प्रहरी कार्यालय बाराका प्रहरी निरीक्षक दिलिपकुमार थापाले जानकारी दिए।
मृतक दुईसहित दुर्घटनामा दुई परिवारका ६ जना घाइते भएका छन्। घाइते हुनेमा मृतक मकेश्वर पटेलकी २२ वर्षीया श्रीमती कलिता देवी र २० महिनाकी छोरी तानेया पटेल तथा मृतक कविता देवीका श्रीमान् २७ वर्षीय कञ्चनकुमार पटेल (मोटरसाइकल चालक) र ३ वर्षीय छोरा आयुष पटेल रहेका छन्। उनीहरूको मकवानपुरको सहकारी अस्पतालसहित विभिन्न अस्पतालमा उपचार भइरहेको छ।
बस दुर्घटनापछि फरार रहेका बस चालक सर्लाही लालबन्दीका ४७ वर्षीय विश्वनाथ चौधरीलाई नियन्त्रणमा लिइएको छ। हाल पूर्व-पश्चिम राजमार्गअन्तर्गत चुरियामाई सडकखण्डमा एकतर्फी सवारी सञ्चालन गरिएको छ।
प्रतिक्रिया दिनुहोस् !