१२ असोज,काठमाण्डाैं । नेकपा (एमाले)ले देशमा विकसित राजनीतिक घटनाक्रमका बारेमा छलफल गर्नका लागि असोज २७, २८ र २९ गते पार्टी केन्द्रीय कमिटीको बैठक बोलाएको छ द केन्द्रीय सचिवालयको आज गुण्डुमा बसेको बैठकले सो निर्णय गरेको हो । पार्टीका उपमहासचिव प्रदीप ज्ञवालीका अनुसार केन्द्रीय कमिटीका एजेण्डा तय गर्नका लागि असोज १९ र २० गते सचिवालयको बैठक डाकिएको छ । ‘सम्भवत हामी चाँडै राष्ट्रिय महाधिवेशन गर्दैछौँ । केन्द्रीय कमिटीले यस विषयमा निर्णय लिन सक्छ,’ ज्ञवालीले भने ।
बैठकले जेनजी आन्दोलनका क्रममा निधन भएकाहरुप्रति श्रद्धाञ्जली व्यक्त गर्दै घाइतेहरुको शीघ्र स्वास्थ्य लाभको कामना गरेको छ । यस्तै, आन्दोलनका दोषी र तोडफोड तथा आगजनीमा संलग्नलाई कारबाहीको दायरामा ल्याउन पनि बैठकले माग गरेको छ । उपमहासचिव ज्ञवालीले भदौ २३ र २४ गतेका घटनाको जाँचबुझ गर्न गठित आयोगले आज पार्टी अध्यक्ष केपी शर्मा ओलीको राहदानी रोक्का गरेको समाचारप्रति गम्भीर ध्यानाकर्षण भएको बताए । उनले यसअघि नै गृह मन्त्रालयबाट मिडिया ट्रायल गराएर गरिएको यस्तो निर्णयले आयोगको विश्वसनीयतामा प्रश्न उठेको बताए ।
उनले सरकारले राजनीतिक दलहरुलाई पन्छाउन खोजेको मात्र नभइ निषेध गरेको र सम्पर्क, संवाद आदि गर्न नचाहेको देखिएको भन्दै यी सबै घटनाप्रति पार्टी गम्भीर र चिन्तित रहेको उल्लेख गरे । ज्ञवालीले सरकारले भदौ २३ र २४ गतेको आगजनी र तोडफोडको घटनामा संलग्नहरुलाई पक्राउ नगर्न दिएको निर्देशनले नेपाल प्रहरीको कानुनसम्मत क्षेत्राधिकारप्रति हस्तक्षेप गरेको र दोषीहरुको मनोबल बढाउने काम गरेको बताए ।
कतिपय नेताहरुलाई भौतिक आक्रमणको धम्की दिएकोले सरकारको नियतमाथि प्रश्न उठ्दै गरेको बताउँदै उनले ‘कतिपय व्यक्तिहरु पुराना राजनीतिक दलहरुलाई चुनावमा जानै दिन्नौँ भन्दैछन् । के यस्तो कुराले चुनावको सुनिश्चिता गर्दछ ? यस प्रकारले गराइएको चुनावले वैद्यता पाउँछ ?’ भन्दै चुनावको सुनिश्चिततामाथि चिन्ता व्यक्त गरे ।
प्रतिक्रिया दिनुहोस् !