११ असाेज, बारा । नेपाल पत्रकार महासंघ, बारा शाखाले सामाजिक सञ्जालमार्फत महिला पत्रकारको चरित्र हत्या गर्ने गरी भ्रामक सामग्री सार्वजनिक गर्ने व्यक्तिलाई तत्काल कानुनी कारबाहीको माग गरेको छ।
महासंघले आज (मिति २०८२ असोज ११ गते) एक प्रेस विज्ञप्ति जारी गर्दै कलैया उपमहानगरपालिका-१ निवासी पत्रकार अञ्जली कुमारी गुप्तामाथि देवताल गाउँपालिका निवासी मोहनलाल पण्डितले गरेको आपत्तिजनक कार्यप्रति गम्भीर चिन्ता व्यक्त गरेको छ।
जारी विज्ञप्तिमा भनिएको छ, “व्यक्तिगत जीवनमा भ्रामक टिप्पणी गर्ने वा लाञ्छना लगाउने कार्य कुनै हालतमा स्वीकार्य छैन। महिला पत्रकारहरूको सुरक्षा, मर्यादा र सम्मान सुनिश्चित गर्नु हाम्रो साझा दायित्व हो।”
महासंघका सूचना अधिकारी तथा सहसचिव इन्दीप कोइरालाले हस्ताक्षर गरेको विज्ञप्तिमा पत्रकार गुप्तामाथि सामाजिक सञ्जालमार्फत भ्रामक खबर प्रचार गर्ने आशयका आधारहीन सामग्रीहरू सार्वजनिक भएको उल्लेख छ।
महासंघले यस घटनामा संलग्न व्यक्ति मोहनलाल पण्डितलाई तत्काल छानबिन गरी आवश्यक कानुनी कारबाही गर्न सम्बन्धित निकायलाई अनुरोध गरेको छ।
साथै, महासंघले पत्रकार अञ्जली कुमारी गुप्ताको सुरक्षा र मानसिक सान्त्वनाको सुनिश्चिततामा सबै पक्षबाट सहयोगको अपेक्षा गरेको छ। पत्रकारिताको मर्यादा कायम राख्न र महिला पत्रकारहरूलाई सुरक्षित महसुस गराउन यस्ता कार्यमा संलग्न व्यक्तिहरूलाई कानुनी दायरामा ल्याउनुपर्ने महासंघको अडान छ।
प्रतिक्रिया दिनुहोस् !