६ असाेज,बारा । बाराको अमलेखगंजमा प्रहरीले २३६ किलोभन्दा बढी लागुऔषध गाँजा सहित एकजनालाई नियन्त्रणमा लिएको छ। प्रहरीले बा २ ख ९५६९ नम्बरको मिनी ट्रकबाट २८ पोका गाँजा बरामद गरेको हो।
आइतबार दिउँसो १ बजेको समयमा इलाका प्रहरी कार्यालय अमलेखगंजले आफ्नो चेकपोइन्टमा मकवानपुरबाट वीरगन्जतर्फ आउँदै गरेको उक्त ट्रकलाई रोकेर जाँच गर्दा ट्रकको छतमा फल्स बटम बनाई त्रिपालले छोपिएको अवस्थामा गाँजा फेला परेको थियो।
प्रहरीका अनुसार, बरामद गरिएको गाँजाको कुल तौल २३६.७५० किलोग्राम रहेको छ। प्रहरीले लागुऔषध र मिनी ट्रकसहित चालक रमेश रुम्बालाई नियन्त्रणमा लिएको छ। पक्राउ पर्ने रुम्बा मकवानपुरको कैलाश गाउँपालिका–१० का ३८ वर्षीय हुन्।
उनीमाथि थप अनुसन्धान भइरहेको इलाका प्रहरी कार्यालय अमलेखगंजले जनाएको छ। घटनाको थप अनुसन्धानका लागि इलाका प्रहरी कार्यालय सिमराबाट प्रहरी नायब उपरीक्षक (डीएसपी) वेद प्रकाश जोशीको कमान्डमा एक टोली खटिएको छ।
प्रतिक्रिया दिनुहोस् !