६ असाेज,काठमाडौं । पूर्वप्रधानन्यायाधीश सुशीला कार्कीको नेतृत्वमा गठित मन्त्रिपरिषद्मा चार नयाँ मन्त्री थपिएका छन् ।
राष्ट्रपति निवास शितलनिवासमा आयोजित विशेष समारोहमा राष्ट्रपति रामचन्द्र पौडेलले उनीहरूलाई पद तथा गोपनीयताको शपथ ग्रहण गराएका हुन् ।
शपथ लिनेहरूमा पूर्वन्यायाधीश अनिलकुमार सिन्हा, राष्ट्रिय आविष्कार केन्द्रका संस्थापक महावीर पुन, पत्रकार जगदिश खरेल, र विज्ञ मदन परियार रहेका छन् । उनीहरूमध्ये सिन्हाले उद्योग, कानुन र भूमि मन्त्रालय, पुनले शिक्षा विज्ञान तथा प्रविधि मन्त्रालय, खरेलले सञ्चार तथा सूचना मन्त्रालय, र परियारले कृषि मन्त्रालयको जिम्मेवारी सम्हालेका छन् ।
योसँगै गत भदौ २७ गते प्रधानमन्त्री नियुक्त भएकी कार्कीको मन्त्रिपरिषद् आठ सदस्यीय भएको छ । मन्त्रीका लागि सिफारिस गरिएकी अतिरिक्त स्वास्थ्य सचिव डा. संगीता मिश्राको नाम भने अन्तिम समयमा आएर रोकिएको छ ।
शपथ ग्रहण समारोहमा सभामुख देवराज घिमिरे, राष्ट्रियसभा अध्यक्ष नारायणप्रसाद दाहाल र प्रधानमन्त्री सुशीला कार्की लगायतका उच्च पदस्थको उपस्थिति थियो ।
प्रतिक्रिया दिनुहोस् !