५ असाेज, काठमाडौं । नक्कली भुटानी शरणार्थी प्रकरणको अनुसन्धान अघि बढाएका प्रहरी अतिरिक्त महानिरीक्षक (एआईजी) मनोज केसीलाई सरकारले केन्द्रीय अनुसन्धान ब्यूरो (सीआईबी) को जिम्मेवारी दिएको छ ।
आइतबार बसेको मन्त्रिपरिषद् बैठकले केसीलाई सीआईबी प्रमुखका रूपमा सरुवा गर्ने निर्णय गरेको हो । यसअघि तत्कालीन सत्ता गठबन्धनमा रहेको नेपाली कांग्रेसको दबाबका कारण केसीलाई जिम्मेवारीबाट हटाइएको थियो ।
उनकै नेतृत्वको टोलीले पूर्वगृहमन्त्री बालकृष्ण खाँणलाई समेत पक्राउ गरेको थियो । त्यही कारण उनले एमाले–कांग्रेस गठबन्धनको सरकारमा समेत राम्रो पोस्टिङ पाएका थिएनन् र प्रदेश समन्वय विभागमा कार्यरत थिए ।
केसीको टोलीले २०७९ चैत १२ मा भुटानी शरणार्थी प्रकरणमा मोरङका केशव दुलाल, ललितपुरका सानु भण्डारी र पाँचथरका टेक गुरुङलाई पक्राउ गरेपछि गृह मन्त्रालयका उच्च पदस्थ अधिकारीहरू संलग्न रहेको खुलासा भएको थियो ।
यसअघिका सीआईबी प्रमुख चन्द्रकुबेर खापुङ प्रहरी महानिरीक्षक बनेपछि सीआईबी कार्यवाहकको भरमा चलिरहेको थियो ।
प्रतिक्रिया दिनुहोस् !