२ असाेज,काठमाण्डाैं । जनमत पार्टीमा आन्तरिक विवाद चर्किएको छ। पार्टीका अध्यक्ष सीके राउतको कार्यशैलीमा असन्तुष्टि जनाउँदै वरिष्ठ उपाध्यक्ष अब्दुल खानसहित ६ जना शीर्ष नेताहरूले सामूहिक राजीनामा दिएका छन्।
पार्टी नेतृत्व परिवर्तनका लागि २४ घण्टे अल्टिमेटम दिए पनि त्यसको सुनुवाइ नभएपछि उनीहरूले असन्तुष्टि व्यक्त गरेका हुन्। राजीनामा दिनेमा वरिष्ठ उपाध्यक्ष खानसँगै केन्द्रीय प्रवक्ता डा. शरतसिंह यादव, जनमत निकट युवा सङ्घका संयोजक सञ्जयकुमार यादव, जनमत स्वास्थ्यकर्मी संघका केन्द्रीय संयोजक सीके सिंह, सुदूरपश्चिम प्रदेशका वरिष्ठ इन्चार्ज राजाराम चौधरी, र राष्ट्रिय परिषद् सदस्य तथा केन्द्रीय सदस्य विक्रमबहादुर बम रहेका छन्।
राजीनामा दिने नेताहरूले अध्यक्ष राउतले ‘जनभावना विपरीत अहंकारपूर्ण व्यवहार’ देखाएको आरोप लगाएका छन्। उनीहरूले विज्ञप्ति जारी गर्दै भनेका छन्, “जनभावना अनुरूप आत्मआलोचना गरी नेतृत्व परिवर्तनको अल्टिमेटमसहित माग प्रस्तुत गर्दा त्यसलाई बेवास्ता गर्नु जेनजी पुस्ताले बगाएको रगतको अपमान हो।”
उनीहरूले पार्टीको साधारण सदस्यसमेत नरहने गरी जनमत पार्टी पूर्ण रूपमा परित्याग गरेको घोषणा गरेका छन्। यो घटनाले जनमत पार्टीभित्रको आन्तरिक कलह सतहमा आएको देखाएको छ।
प्रतिक्रिया दिनुहोस् !