१ असाेज,बारा । वन्यजन्तुको आक्रमणबाट मानिसको मृत्यु भएपछि बाराको वन क्षेत्रमा प्रवेश निषेध गरिएको छ।
डिभिजन वन कार्यालय, बाराले मंगलबार एक सूचना जारी गर्दै जितपुरसिमरा उपमहानगरपालिका वडा नम्बर २२ र ४ को वन क्षेत्रमा बाघको आक्रमणबाट केही व्यक्तिको मृत्यु भएकोले वन्यजन्तुको जोखिमलाई ध्यानमा राखेर वन प्रवेशमा रोक लगाएको जनाएको छ।
कार्यालयले वन ऐन, २०७६ को दफा ९ बमोजिम राष्ट्रिय वन (सरकारद्वारा व्यवस्थित वन, सामुदायिक वन, साझेदारी वन) मा प्रवेश निषेध गरेको हो। यो आदेश २०८२ असोज १ गतेदेखि ७ गतेसम्म लागू हुनेछ।
यस अवधिमा वन क्षेत्रभित्र च्याउ टिप्न, दाउरा, खरघाँस, पात, सोत्तर लगायतका वन पैदावार सङ्कलन गर्न, घरपालुवा जनावर लैजान, तथा पिकनिक मनाउन पूर्ण रूपमा रोक लगाइएको छ। यसबाहेक, पूर्व-पश्चिम लोकमार्ग र सहायक मार्गमा गाडी रोक्न वा पार्किङ गर्न पनि निषेध गरिएको छ।
डिभिजनल वन अधिकृत राजीव कुमार झाद्वारा जारी गरिएको सूचनामा अति आवश्यक काम परेमा डिभिजन वन कार्यालयको सहमति लिएर मात्र प्रवेश गर्न सकिने उल्लेख गरिएको छ। यदि कोही कसैले अटेर गरेमा कानुनबमोजिम कारबाही हुने र कुनै पनि धनजनको क्षति भएमा त्यसको सम्पूर्ण दायित्व प्रवेश गर्ने व्यक्तिकै हुने सूचनामा स्पष्ट पारिएको छ।
प्रतिक्रिया दिनुहोस् !