जेनजी आन्दोलनमा मृतकको संख्या ५० भन्दा बढी, थप दुई जनाको उपचारका क्रममा मृत्यु

२९ भदाै,​काठमाडौं । जेनजी आन्दोलनका क्रममा गम्भीर घाइते भएका थप दुई जनाको उपचारका क्रममा मृत्यु भएको छ । वीर अस्पतालको भेन्टिलेटरमा उपचाररत उनीहरूको शुक्रबार राति र शनिबार मृत्यु भएको हो ।
​उपचारमा संलग्न न्युरो सर्जन डा. राजीव झाका अनुसार दुवै जनाको टाउकोमा गोली लागेको थियो। “हामीले उहाँहरूलाई बचाउन सकेनौं,” डा. झाले भने। मृतकको पहिचान भने खुल्न सकेको छैन।
​यसअघि, प्रहरी प्रशासनको तथ्यांकअनुसार सोमबार र मंगलबार भएको आन्दोलनमा ५१ जनाको मृत्यु भएको थियो। योसँगै मृतकको संख्या ५० भन्दा बढी पुगेको छ।
​यसैबीच, आगलागीका कारण मृत्यु भएका थप शवहरू फेला पर्ने क्रम जारी छ। चाबहिलको चुच्चेपाटीमा रहेको भाटभटेनीमा आज बिहान मात्रै ६ वटा शव फेला परेका छन्। शवहरू पूर्ण रूपमा जलेको हुनाले उनीहरूको पनि पहिचान हुन सकेको छैन। मृतकको संख्या अझै बढ्न सक्ने अनुमान गरिएको छ।