२६ भदाै,काठमाडौं । जेनजी आन्दोलनको नाममा भएको आगजनी, तोडफोड र लुटपाटपछि देशमा राजनीतिक शून्यता छाएको बेला आन्दोलनकारी समूहहरूबीच नै चर्को विवाद सुरु भएको छ।
आन्दोलनका अगुवाहरूबीचको मतभेदका कारण सामाजिक सञ्जालमा अलग-अलग समूह र विचारहरू देखा परेका छन्।
यसैक्रममा, सैनिक मुख्यालयमा अगाडि भेला भएका युवाहरूबीच अन्तरिम मन्त्रिपरिषद्को नेतृत्व कसले लिने भन्ने विषयमा भएको विवादले झडपको रूप लिएको छ। समूहहरूले सुशीला कार्की, कुलमान घिसिङ, बालेन शाह, र हर्क साम्पाङ लगायतका व्यक्तिहरूको नाम अघि सार्दा उनीहरूबीच कुटाकुट भएको हो।
हर्क साम्पाङको नाममा लफडा
सैनिक मुख्यालय अगअगाडी भएको भेलाका एक सहभागीका अनुसार, हर्क साम्पाङलाई अन्तरिम सरकारको नेतृत्व दिन नहुने भन्दै केही युवाहरूले विरोध गरेपछि साम्पाङका समर्थकहरूले उनीहरूलाई लखेटेर कुटपिट गरेका छन्। यस घटनाले जेनजी आन्दोलनभित्रको आन्तरिक द्वन्द्व सतहमा ल्याएको छ।
आन्दोलनमाथि प्रश्नचिह्न
कुनै निश्चित संगठन, संरचना वा नेतृत्वबिना अघि बढेको यो आन्दोलन बिस्तारै ‘तमासा’ मा परिणत हुँदै गएको भन्दै चौतर्फी आलोचना र चिन्ता बढेको छ। फरक-फरक समूहले अलग-अलग वक्तव्य जारी गर्न थालेपछि आन्दोलनबाट उत्पन्न राजनीतिक शून्यता झनै लम्बिएको छ। यसैबीच, सेनाले पनि जेनजी समूहहरूको आधिकारिकतामाथि प्रश्न उठाएको छ, जसले गर्दा यस आन्दोलनको भविष्य अनिश्चित बनेको छ।
प्रतिक्रिया दिनुहोस् !