ईर्साद अन्सारी
२६ भदाै,बारा । जिल्ला प्रशासन कार्यालय बाराले जिल्लाको शान्ति सुरक्षा कायम गर्न भदौ २६ गते राति ८ बजेदेखि भदौ २७ गते बिहान ६ बजेसम्म जिल्लाभर कर्फ्यु आदेश जारी गरेको छ।
प्रमुख जिल्ला अधिकारी प्रकाश पौडेलले आज एक विज्ञप्ति जारी गर्दै स्थानीय प्रशासन ऐन, २०२८ बमोजिम यो आदेश जारी गरिएको जानकारी दिएका हुन्।
हालको विषम परिस्थितिमा सर्वसाधारण नागरिक र सार्वजनिक सम्पत्तिमा क्षति पुर्याउने, लुटपाट, आगजनी र व्यक्ति लक्षित हिंस्रक आक्रमण जस्ता अवाञ्छित गतिविधि हुन नदिनका लागि कर्फ्यु लगाइएको हो।
कर्फ्युको समयमा कुनै पनि प्रकारको भेला, जुलुस, प्रदर्शन, सभा, बैठक वा घेराउ गर्न पाइने छैन। यद्यपि, अत्यावश्यक सेवा जस्तै एम्बुलेन्स, दमकल, शव वाहन, स्वास्थ्यकर्मी, सञ्चारकर्मी, पर्यटक, मानव अधिकार तथा कूटनीतिक नियोगका सवारी साधनलाई भने आवतजावतमा सहजीकरण गरिने विज्ञप्तिमा उल्लेख छ। हवाई टिकटको आधारमा हवाई यात्रुहरुलाई पनि आवतजावतमा छुट दिइनेछ।
प्रतिक्रिया दिनुहोस् !