२५ भदाै,काठमाडौँ — मुलुकमा शान्ति सुरक्षा कायम राख्ने उद्देश्यले सरकारले जारी गरेको निषेधाज्ञा र कर्फ्यूको सन्दर्भमा नेपाली सेनाले सबैलाई सहयोगका लागि अपिल गरेको छ।
एक विज्ञप्ति जारी गर्दै सेनाले आन्दोलनका क्रममा भएको जनधनको क्षतिप्रति दुःख व्यक्त गरेको छ। विज्ञप्तिअनुसार, आन्दोलनको आडमा घुसपैठ गरी तोडफोड, आगजनी, लुटपाट र हिंस्रक आक्रमणका साथै बलात्कारका प्रयाससमेत भइरहेकाले शान्ति सुरक्षा कायम गर्न भदौ २५ गते साँझ ५ बजेसम्म निषेधाज्ञा र त्यसपछि भोलि बिहान ६ बजेसम्म कर्फ्यू जारी गरिएको छ।
यस अवधिमा अत्यावश्यक सेवाका सवारीसाधन (एम्बुलेन्स, शव वाहन, दमकल, स्वास्थ्यकर्मी र सुरक्षाकर्मी) बाहेक अन्य सवारीसाधन चलाउन पूर्ण रूपमा रोक लगाइएको छ।
सेनाले आन्दोलनका नाममा हुने कुनै पनि किसिमका प्रदर्शन, तोडफोड, लुटपाट, आगजनी वा व्यक्ति तथा सम्पत्तिमाथि गरिने आक्रमणलाई दण्डनीय अपराध मानिने र त्यस्ता कार्यमा संलग्नहरूमाथि कडा कारबाही गरिने चेतावनीसमेत दिएको छ।
साथै, सेनाले सबै अवकाश प्राप्त सैनिक, सुरक्षाकर्मी, राष्ट्रसेवक र सञ्चारकर्मीलाई आधिकारिक सूचनामा मात्र विश्वास गर्न र अफवाह नफैलाउन आग्रह गरेको छ। राष्ट्रिय एकता र सामाजिक सद्भाव कायम राख्दै जनजीवन सामान्य बनाउन आफ्नो दायित्व निर्वाह गर्न पनि सबैलाई अपिल गरिएको छ।
प्रतिक्रिया दिनुहोस् !