२५ भदाै,बारा । बारा जिल्लामा मंगलबार भएको शृंखलाबद्ध तोडफोड र आगजनीका घटनाहरूले जनजीवनलाई अस्तव्यस्त बनाउनुका साथै ठूलो भौतिक क्षति पुर्याएको छ।
आन्दोलनकारीहरूले विभिन्न राजनीतिक दलका कार्यालयहरू, सरकारी भवनहरू, र जनप्रतिनिधिहरूको घर तथा सवारीसाधनहरूलाई निशाना बनाएका छन्। कलैया उपमहानगरपालिकाको कार्यालयमा तीनवटा सवारीसाधनमा तोडफोड गरिनुका साथै कार्यालय अगाडि आगजनी गरिएको छ।
यसैगरी, जीतपुरसिमरा, विश्रामपुर, महागढीमाई, र कोल्हवीका नगर तथा वडा कार्यालयहरूमा पनि व्यापक तोडफोड र आगजनी भएको छ। उपराष्टपति रामसहाय प्रसाद यादव, प्रतिनिधि सभा सदस्यहरू किसान श्रेष्ठ र ज्वाला कुमारी साह, साथै प्रदेश सभा सदस्यहरू मोहम्मद समिर र रबिन्द्र दास लगायतका जनप्रतिनिधिहरूको घरमा तोडफोड र आगजनी गरिएको छ।
सोही क्रममा उपराष्टपतिको घरबाट सामानहरू पनि लुटपाट भएको छ। यसबाहेक, नेकपा, नेपाली कांग्रेस, जसपा नेपाल र राप्रपा लगायतका राजनीतिक दलका कार्यालयहरूमा पनि तोडफोड भएको छ।
सरकारी कार्यालयहरू जस्तै भूमि सुधार तथा मालपोत कार्यालय, जिल्ला सरकारी वकिल कार्यालय, जिल्ला अदालत, आन्तरिक राजस्व कार्यालय र इलाका प्रशासन कार्यालयमा पनि आगजनी र तोडफोडका घटना भएका छन्।
आन्दोलन नियन्त्रण गर्न प्रहरीले कलैया उपमहानगरपालिकाका नगरप्रमुख बिनोद प्रसाद साहको घर घेराउ गर्ने क्रममा ७ राउन्ड हवाई फायर र नेकपा पार्टी कार्यालय अगाडि एक राउन्ड अश्रु ग्यास प्रहार गरेको थियो। आज नेपाली सेनाले सुरक्षा कमाण्ड समालेपछि अवस्था सामान्य बन्दै गएकाे छ ।
प्रतिक्रिया दिनुहोस् !