२३ भदाै,काठमाण्डाैं । राष्ट्रिय स्वतन्त्र पार्टी (रास्वपा) का सभापति रवि लामिछानेले नक्खु कारागारबाट एक मार्मिक अपिल जारी गर्दै नेपालको वर्तमान राजनीतिक अवस्थालाई ‘इतिहासकै सबैभन्दा कालो दिन’ भनेका छन्।
उनले भदौ २३ गते भएको कुशासन र भ्रष्टाचारका कारण १९ भन्दा बढी निर्दोष विद्यार्थीको हत्याको घटनालाई ‘निर्दोष, निरपराध र अबोध बालबालिकामाथि गरिएको क्रूरता’ को संज्ञा दिएका छन्। यसै सन्दर्भमा, उनले सत्तामा रहेका कुशासन र भ्रष्टाचारका नाइकेहरूलाई अब एक मिनेट पनि शासन गर्न नदिने उद्घोष गरेका छन्।
लामिछानेले Gen Z लाई सडकमा आउन बाध्य पार्ने यिनै आततायीहरू भएको बताउँदै उनीहरूलाई दण्डित गर्न र देशलाई अहिलेको विषम परिस्थितिबाट बाहिर निकाल्न चार प्रमुख मागहरू राखेका छन्: Gen Z सहितको अन्तरिम नागरिक सरकार गठन गर्ने, २०४६ सालपछिका सबै उच्चपदस्थ र उनीहरूका परिवारको सम्पत्ति छानबिन गर्ने, संविधान संशोधन वा पुनर्लेखनका लागि विज्ञहरूको समिति बनाउने, र आजको हत्याकाण्डको छानबिन गर्न न्यायिक आयोग गठन गर्ने।
यी मागहरू पूरा नभए आफ्ना सांसदहरूलाई संसदबाट राजीनामा दिन तयार रहन उनले निर्देशनसमेत दिएका छन्। देश अब आन्दोलनमा नभई क्रान्तिमा प्रवेश गरेको भन्दै उनले सबैलाई संयमित र शान्तिपूर्ण क्रान्तिमा सहभागी हुन आह्वान गरेका छन्, जसले यी आततायीहरूलाई दण्डित मात्र नभई देश नै बदल्नेछ।
प्रतिक्रिया दिनुहोस् !