२३ भदौ,काठमाण्डाै । काठमाडौंको बानेश्वरस्थित संसद भवन परिसरमा भएको जेनेरेसन-जी (Gen-Z) युवाहरूको प्रदर्शनका क्रममा कम्तीमा ५० जना गम्भीर घाइते भएका छन् ।
प्रदर्शनकारीहरूको उद्दार र अस्पताल पुर्याउने काममा संलग्न काठमाडौं महानगरपालिकाका अनुसार घाइतेहरूको संख्या करिब ५० पुगेको छ ।
महानगरपालिकाका एक कर्मचारीका अनुसार घाइतेहरूमध्ये अधिकांशलाई गोली लागेको छ । ‘हामीले करिब ५० जना घाइतेलाई एम्बुलेन्समा राखेर विभिन्न अस्पतालमा पुर्यायौँ,’ उनले भने । घाइतेहरूको शरीरमा रगत लागेको र उनीहरूको अवस्था गम्भीर रहेको पनि उनले बताए । सामान्य प्रकृतिका घाइतेहरूको संख्या भने यो भन्दा फरक रहेको छ ।
महानगरपालिकाले घाइतेहरूलाई सिभिल अस्पताल, ट्रमा सेन्टर र पाटन अस्पताललगायतका स्वास्थ्य संस्थामा उपचारका लागि पठाएको थियो ।
केही घाइतेलाई एउटा अस्पतालमा उपचार सम्भव नभएपछि अर्को अस्पतालमा पनि लगिएको थियो । काठमाडौं महानगरपालिकासहित अन्य संस्थाहरूले पनि एम्बुलेन्स सेवा उपलब्ध गराएर घाइतेहरूलाई सहयोग गरेका थिए ।
प्रतिक्रिया दिनुहोस् !