पर्साको वीरगन्जमा जुवाको खाल: प्रहरीको संरक्षणमा लाखौंको हारजित

२० भदाै, बारा । पर्साको वीरगन्ज महानगरपालिकास्थित ब्रम्ह चोकमा खुलेआम जुवाको खाल सञ्चालन भइरहेको र त्यसमा स्थानीय प्रहरीको मिलेमतो रहेको खुलेको छ। दिनहुँ लाखौँ रुपैयाँको हारजित हुने यस खालमा नेपाली र भारतीय दुवै जुवाडे सहभागी हुने गरेका छन्।

​स्रोतका अनुसार, ब्रम्ह चोकको एक घरमा सञ्चालित यस अवैध जुवा खालको मुख्य सञ्चालकहरू शंकर र रवीन्द्र हुन्। उनीहरूले हरेक दिन राति ठूलो संख्यामा जुवाडेहरूलाई भेला गराई कौडा खेलाई जुवा खेलाउने गर्छन्। जुवामा ठूलो रकमको बाजी लगाइने हुँदा धेरै जुवाडेहरूले लाखौँ रुपैयाँ गुमाएका छन्। विशेषगरी नेपाली जुवाडेहरू यस्ता खालमा फसेर ठूलो आर्थिक संकटमा परेका छन्।

​यो अवैध कार्यमा संलग्नहरूले राजनीतिक तथा प्रशासनिक पहुँचको दुरुपयोग गरेको आरोप लागेको छ। स्रोतका अनुसार, जुवाबाट उठेको रकम सशस्त्र प्रहरीका डीआईजीसम्म पुग्ने गरेको दाबी गरिएको छ, जसले गर्दा प्रहरी प्रशासनले यस विषयमा आँखा चिम्लेको छ।

​पटकपटक यस्ता अवैध गतिविधिबारे जानकारी पाउँदा पनि पर्सा प्रहरीले कुनै कारबाही नगर्दा स्थानीय जनतामाथि प्रश्न उठेको छ। स्थानीय प्रशासनले यस्ता आपराधिक गतिविधि नियन्त्रण गर्न तत्काल कदम चाल्नुपर्ने माग स्थानीय बासिन्दाले गरेका छन्। यस घटनाले प्रहरीको भूमिकामाथि गम्भीर प्रश्नचिन्ह खडा गरेको छ र प्रहरी प्रशासनले निष्पक्ष छानबिन गरी दोषीलाई कारबाही गर्नुपर्ने आवश्यकता देखिएको छ।