१६ भदाै,पर्सा । गृहमन्त्री रमेश लेखकले लिम्पियाधुरा, कालापानी र लिपुलेक नेपालकै भूमि भएकोमा जोड दिँदै यस विषयमा छिमेकी मित्रराष्ट्रहरूले चित्त दुखाउनुनपर्ने बताएका छन्।
नेपाल प्रेस युनियन पर्साले आज वीरगञ्जमा आयोजना गरेको पत्रकार सम्मेलनमा गृहमन्त्री लेखकले भारत र चीनबीच नेपालको भूभाग लिपुलेकलाई द्विपक्षीय व्यापारिक नाका बनाउने गरी भएको सम्झौताप्रति प्रधानमन्त्री केपी शर्मा ओलीले जनाएको आपत्ति सही भएको बताए।
गृहमन्त्री लेखकले भने, “लिम्पियाधुरा, कालापानी र लिपुलेक भूमि नेपालको हो। हामीले हाम्रो भूमिलाई हाम्रो भूमि हो भन्दा कुनै पनि देशसँग हाम्रो सम्बन्ध बिग्रिनुपर्ने कारण छैन।” उनले थपे, “यसमा मित्रराष्ट्र भारत र चीनले पनि चित्त दुखाउनुपर्ने कुनै कुरा छैन। त्यो भूमि हाम्रो हो। यसमा हामी प्रस्ट छौँ।”
गृहमन्त्री लेखकले प्रधानमन्त्री ओली चीन भ्रमणमा रहेको बेला मित्रराष्ट्र भारत र चीनसँग नेपालको भूमिलाई लिएर भएको सम्झौतामा आपत्ति जनाउनु उचित भएको स्पष्ट पारे। उनले नेपालको भूमि कुनै पनि राष्ट्रविरुद्ध प्रयोग हुन नदिने पनि स्पष्ट पारे।
प्रतिक्रिया दिनुहोस् !