१६ भदाै,बारा । बारा, पर्सा र रौतहटमा कम्युनिष्ट आन्दोलनको जग बसाल्ने किसान आन्दोलनका अगुवा नन्दन अर्यालको ९५ वर्षको उमेरमा गएराति काठमाडौँमा निधन भएको छ। बाराको बघवनका स्थायी बासिन्दा अर्यालको निधनले नेपाली कम्युनिष्ट आन्दोलनले एक जुझारु योद्धा गुमाएको छ।
२०११ सालको पञ्चायतकालीन कठोर शासन व्यवस्थामा बारा, पर्सा र रौतहटमा किसान आन्दोलनको अग्रिम मोर्चामा रहेर उनले नेतृत्वदायी भूमिका खेलेका थिए। पञ्चायती सत्ताविरुद्ध जनतालाई सङ्गठित गर्दै उनले निरङ्कुश शासनको विरुद्धमा आवाज उठाएका थिए, जसका कारण उनी तत्कालीन राज्यसत्ताको नजरमा परे।
जनताको पक्षमा निरन्तर आवाज उठाउँदा उनलाई पटक-पटक वारेन्ट जारी भएको थियो र पञ्चायती शासनसँग जुध्दै उनले लामो समय भूमिगत जीवन बिताएका थिए। उनको यो साहस र समर्पणले कम्युनिष्ट आन्दोलनलाई तराई क्षेत्रमा स्थापित गर्न महत्त्वपूर्ण योगदान पुर्याएको थियो।
अर्यालको पार्थिव शरीरको आजै पशुपति आर्यघाटमा अन्त्येष्टि गरिने पारिवारिक स्रोतले जनाएको छ। उनको निधनले नेपाली राजनीतिक र कम्युनिष्ट आन्दोलनमा एक युगको अन्त्य भएको छ। देशले उनलाई सधैँ किसान र मजदुरको हकहितका लागि लडिरहने योद्धाको रूपमा सम्झिनेछन्।
प्रतिक्रिया दिनुहोस् !