९ भदाै,काठमाडौं । नेपाल यातायात व्यवसायी राष्ट्रिय महासंघले सरकारले सार्वजनिक सवारी साधनमा अनिवार्य गरेको एम्बोस्ड नम्बर प्लेटको निर्णयप्रति गम्भीर ध्यानाकर्षण भएको जनाएको छ।
महासंघले पूर्वाधार र प्रविधि विकास नगरी एकतर्फी रूपमा राजश्व संकलन गर्ने सरकारी निर्णयको कडा विरोध गरेको हो।
भौतिक पूर्वाधार तथा यातायात मन्त्रालयले २०८२ साल असोज १ गतेदेखि सबै सवारी साधनमा एम्बोस्ड नम्बर प्लेट अनिवार्य गर्ने निर्णय गरेको थियो। तर, महासंघले आईतबार एक प्रेस विज्ञप्ति जारी गर्दै यस निर्णयलाई तत्काल पुनर्विचार गर्न माग गरेको छ।
महासंघका महासचिव डेकनाथ गौतमद्वारा हस्ताक्षरित विज्ञप्तिमा भनिएको छ, “देशभरका यातायात व्यवस्था कार्यालयहरूमा एम्बोस्ड नम्बर लगाउने प्रविधिको विकास भएको छैन। पुरानै नम्बरमा कर तिरेर कागजात नवीकरण गर्ने र एम्बोस्ड नम्बरको मात्र राजश्व लिने कार्य न्यायोचित छैन।”
महासंघले सम्मानित सर्वोच्च अदालतको फैसलाको सम्मान गरे पनि पूर्वाधार तयार नभएको अवस्थामा हतारमा गरिएको निर्णयले व्यवसायीहरूलाई समस्या परेको बताएको छ।
विज्ञप्तिमा थप भनिएको छ, “भौतिक पूर्वाधार र प्रविधि विकास गरी आवश्यक सुधार नगरी यथास्थितिमा एम्बोस्ड नम्बर प्लेट लगाउने निर्णयको विरोध गर्न सम्पूर्ण व्यवसायीहरूलाई आह्वान गर्दछौं।”
महासंघले तत्कालका लागि एम्बोस्ड नम्बर प्लेट नलगाउन पनि सम्पूर्ण व्यवसायीहरूलाई अपिल गरेको छ।
प्रतिक्रिया दिनुहोस् !