६ भदाै,बारा । नेपाल पत्रकार महासंघले कोशी प्रदेश सरकारले ल्याएको ‘आमसञ्चार सम्बन्धमा व्यवस्था गर्न बनेको विधेयक २०८१’प्रति गम्भीर आपत्ति जनाएको छ। महासंघले प्रेस स्वतन्त्रतामा आघात पुर्याउने प्रावधान रहेको भन्दै तत्काल सच्याउन माग गरेको छ।
महासंघका महासचिव रामप्रसाद दाहालद्वारा जारी विज्ञप्तिमा कोशी प्रदेश समितिले उक्त विधेयक प्रदेश सभाको न्याय प्रशासन तथा विधायन समितिबाट पारित भई अगाडि बढेको जानकारी दिएको उल्लेख छ। यो विधेयकमा पत्रकार तथा सञ्चारमाध्यमलाई डेढ लाख रुपैयाँसम्म जरिबाना र सञ्चारमाध्यमको इजाजत खारेज गर्नेसम्मका प्रावधान रहेको महासंघले जनाएको छ।
विज्ञप्तिमा भनिएको छ, “सरोकारवाला पक्षसँग छलफल र सहमतिमा कानुन निर्माण गर्ने लोकतान्त्रिक प्रक्रियालाई बेवास्ता गरी बलपूर्वक कठोर कानुन ल्याउन खोज्नु दुःखद र आपत्तिजनक छ।” महासंघले संविधानविपरीत सञ्चारमाध्यमको दर्ता खारेजी लगायतका प्रावधान नसच्याए आन्दोलनमा उत्रने कोशी प्रदेश समितिको योजनामा केन्द्रीय समितिले पूर्ण समर्थन र ऐक्यबद्धता जनाएको छ।
महासंघले प्रेस स्वतन्त्रताको अन्तर्राष्ट्रिय मापदण्ड, नेपालको संविधान र प्रेसले उपभोग गरिरहेको स्वतन्त्रता संकुचन नहुने गरी कानुन निर्माण गर्न प्रदेश सरकार र प्रदेश सभासँग जोडदार माग गरेको छ। यदि विधेयक बलपूर्वक पारित गरिएमा त्यसलाई अस्वीकार गरी आन्दोलनमा उत्रन बाध्य हुने चेतावनीसमेत महासंघले दिएको छ।
प्रतिक्रिया दिनुहोस् !