३० साउन,काठमाण्डाै । फौजदारी मुद्दामा कानूनी कारबाही प्रक्रियामा रहेका व्यक्तिलाई पार्टीको सदस्यता दिएको भन्दै आलोचना भएपछि नेपाली कांग्रेसले महोत्तरीका देवेन्द्र यादवको सदस्यता खारेज गरेको छ।
पार्टीका मुख्य सचिव कृष्णप्रसाद पौडेलले बिहीबार जारी गरेको प्रेस विज्ञप्तिअनुसार, सभापति शेरबहादुर देउवा र महामन्त्री विश्वप्रकाश शर्माबीच पार्टी केन्द्रीय कार्यालयमा छलफल भइरहेका बेला केही कार्यकर्ताले यादवलाई लिएर पार्टी प्रवेश गराउन अनुरोध गरेका थिए। सोहीअनुरूप सभापति देउवाले यादवलाई पार्टी सदस्यता दिएका थिए।
तर, पछि यादवमाथि फौजदारी मुद्दा रहेको जानकारी प्राप्त भएपछि उनको सदस्यता खारेज गर्ने निर्णय गरिएको विज्ञप्तिमा उल्लेख छ।
प्रेस विज्ञप्तिमा भनिएको छ, “निज व्यक्ति उपर फौजदारी कानूनी कार्वाही प्रक्रिया रहेको भन्ने थाहा हुन आएको हुँदा निजले प्राप्त गरेको पार्टी सदस्यता खारेज गरिएको जानकारी गराइन्छ।”
कांग्रेसले यस विषयमा गृह प्रशासनको पनि ध्यानाकर्षण गराएको छ। साथै, यादवलाई पार्टी प्रवेश गराउन ल्याउने कार्यकर्ताहरूसँग पनि यसबारे गम्भीरतापूर्वक जानकारी लिइरहेको कांग्रेसले जनाएको छ।
प्रतिक्रिया दिनुहोस् !