३० साउन,नेपालगञ्ज । बाँकेको नेपालगञ्ज उपमहानगरपालिका-४ मा लागुऔषध खैरो हेरोइन कारोबारमा संलग्न चार जनालाई प्रहरीले गोली हानेर नियन्त्रणमा लिएको छ। प्रहरीमाथि नै इँटा प्रहार गरेपछि जवाफी कारबाहीस्वरूप प्रहरीले गोली चलाएको हो।
जिल्ला प्रहरी कार्यालय बाँकेका एसपी रामप्रसाद घर्तीका अनुसार, पक्राउ पर्नेमा नेपालगञ्ज उपमहानगरपालिका-५ का २६ वर्षीय भाइजन अन्सारी, २२ वर्षीय अमन साह र भारत, बहराइजका २० वर्षीय अजयकुमार तथा २० वर्षीय कार्त्तिककुमार रहेका छन्।
लागुऔषध नियन्त्रण ब्युरो शाखा कार्यालय नेपालगञ्जको टोलीले शंका लागेर खानतलासी गर्ने क्रममा उनीहरूले प्रहरीमाथि इँटा प्रहार गरेका थिए। सो क्रममा एकजना प्रहरी घाइते भएपछि प्रहरीले गोली चलाएको हो।
गोली लागेर कार्त्तिककुमारको दायाँ खुट्टामा चोट लागेको छ। उनको उपचार अस्पतालमा भइरहेको प्रहरीले जनाएको छ। प्रहरीले उनीहरूबाट २६५ ग्राम खैरो हेरोइन बरामद गरेको छ। इँटा प्रहारबाट घाइते भएका प्रहरीको पनि उपचार भइरहेको छ।
प्रतिक्रिया दिनुहोस् !