२८ साउन,बारा । धनुषा जिल्लाको जनकपुरधामस्थित नेपाल पत्रकार महासंघ, मधेस प्रदेश समितिको कार्यालय निर्माणस्थलमा भएको हिंसात्मक घटनाप्रति प्रेस चौतारी नेपालले गम्भीर ध्यानाकर्षण भएको जनाएको छ।
बार एसोसिएसनका पदाधिकारीहरूको नेतृत्वमा गरिएको जग्गा कब्जाको असंवैधानिक प्रयासका क्रममा पत्रकारहरूमाथि आक्रमण भएको प्रेस चौतारीको विज्ञप्तिमा उल्लेख छ।
साउन २७ गते भएको उक्त आक्रमणमा नेपाल पत्रकार महासंघ, मधेस प्रदेशका अध्यक्ष श्याम बन्जारा, उपाध्यक्ष ज्योति झा, महासचिव शैलेन्द्र क्रान्ति र पत्रकार दिवाकर साह घाइते भएका छन्।
आक्रमणबाट महासचिव शैलेन्द्र क्रान्तिको खुट्टा भाँचिएको छ भने पत्रकार दिवाकर साहको टाउकोमा गम्भीर चोट लागेको छ।
प्रेस चौतारी नेपालले यस घटनालाई प्रेस स्वतन्त्रता र लोकतान्त्रिक मूल्यमाथि भएको योजनाबद्ध हमलाको रूपमा लिएको छ। संस्थाले विज्ञप्ति जारी गर्दै पेशागत मर्यादाको ख्याल नगरी बार एसोसिएसनको नाममा गुण्डागर्दी भएको भन्दै घटनाको निन्दा गरेको छ।
प्रेस चौतारीले आक्रमणमा संलग्न सबै व्यक्तिहरूलाई तत्काल कानुनी कारबाहीको दायरामा ल्याउन र घाइते पत्रकारहरूको सम्पूर्ण उपचार खर्च सरकारले व्यहोर्न माग गरेको छ। साथै, भविष्यमा यस्ता घटना दोहोरिन नदिन राज्यले सुनिश्चितता गर्नुपर्नेमा जोड दिएको छ।
यदि यस्ता घटनाको प्रतिकार गर्नुपर्ने अवस्था आएमा प्रेस चौतारी बाध्य हुने चेतावनी पनि संस्थाले दिएको छ। प्रेस विज्ञप्तिमा प्रेस चौतारीका महासचिव हिरामान लामाको हस्ताक्षर रहेको छ।
प्रतिक्रिया दिनुहोस् !