२८ साउन,काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेकी पत्नी निकिता पौडेलले गृहमन्त्री रमेश लेखकमाथि गम्भीर आरोप लगाएकी छन्।
उनले आफ्नो फेसबुक स्टाटसमार्फत गृहमन्त्री लेखकलाई खुला प्रश्न गर्दै आम थुनुवाले पाउने अड्डासारको सुविधा रवि लामिछानेको हकमा किन रोकिएको भन्दै प्रश्न गरेकी छिन्।
अदालतको आदेश रोकिएको आरोप
निकिताले गृहमन्त्री लेखकको निर्देशनमा अड्डासारको सुविधा रोकिएको आरोप लगाउँदै लेखेकी छिन्, “आम थुनुवाले पाउने अड्डासारको सुविधा, मेरै श्रीमानका हकमा अदालत पुग्छ, अदालतले आदेश नै गर्दा पनि तपाईंको निर्देशनमा रोकिन्छ, किन?”
उनले न्यायालयमाथि पनि दबाब सिर्जना गरिएको दाबी गरेकी छिन्।
अदालतमा मुद्दाको पेसी चढेपछि गृहमन्त्रीकै निर्देशनमा न्यायिक परिषद्मा उजुरी पर्ने गरेको, उजुरीको ड्राफ्ट गृहमन्त्रीकै कार्यकक्षमा तयार हुने गरेको र न्यायाधीशलाई तर्साउन समाचारका लिङ्कहरू पठाउने गरेको उनको आरोप छ।
‘अन्याय विरुद्ध अन्तर्राष्ट्रिय अदालतसम्म लड्छु’
निकिताले अदालतमा हुने बहसमा सरकारी पक्ष नाजवाफ भए पनि फैसला सधैँ विपक्षमा आउने गरेको बताएकी छिन्।
उनले दुई तिहाइको सरकार भएको बेला विपक्षी दलका नेतामाथि भइरहेको यो अन्यायका विरुद्ध आफू अन्तर्राष्ट्रिय अदालतसम्म जान तयार रहेको उल्लेख गरेकी छिन्। उनले भनेकी छिन्, “मलाई अन्तर्राष्ट्रिय अदालतमा यो अन्याय विरुद्ध बोल्नका लागि मद्दत चाहिने भएको हुनाले पहुँच पुगेका व्यक्तिहरूले मद्दत गर्नुहोला।”
प्रधान न्यायाधीशलाई प्रश्न
निकिताले सम्माननीय प्रधान न्यायाधीशलाई सम्बोधन गर्दै आफ्नो कार्यकालमा भएको ‘खुला अन्याय’ बारे सोच्न आग्रह गरेकी छिन्।
उनले जिल्ला अदालतको आदेश विरुद्ध उच्च अदालतमा अपिल गर्न जाने कि नजाने भनेर प्रश्न गरेकी छिन्।
उनले बढुवाको मुखमा न्यायाधीशहरूले न्याय दिन आँट नगर्ने गरेको र यसले गर्दा न्यायालयको हरिबिजोग भएको भन्दै दुःख व्यक्त गरेकी छिन्।
उनले भनेकी छिन्, “उस्तै दुरुस्तै आइडेन्टिकल केसमा सर्वोच्च अदालतले समेत मान्छेलाई धरौटीमा छोड्नु भन्ने नजिर स्थापित गरेको छ। तर त्यसका विपरीत एउटा रवि लामिछाने चाहिँ थुनिएको थुनियै छ।”
न्याय नपाउन्जेल लड्ने प्रतिबद्धता
निकिता पौडेलले रमेश लेखक गृहमन्त्री भएपछि मात्र आफ्ना श्रीमानमाथि सबै मुद्दा लागेको आरोप लगाएकी छिन्। कुनै पनि मुद्दा हदम्यादमा नरहेको उनको भनाइ छ।
उनले आफ्नो श्रीमानले राज्यका सबै निकाय कब्जा गरिएको बताए पनि आफू भने न्यायका लागि निरन्तर लडिरहने प्रतिबद्धता व्यक्त गरेकी छिन्। न्याय पाउँछु या पाउँदिन भन्ने कुराको परवाह नगरी कानुन र संविधानले दिएका सबै ढोकाहरू ढकढक्याइरहने र न्याय नपाउन्जेल अन्तर्राष्ट्रिय अदालतसम्म पनि जाने उनले बताएकी छिन्।
प्रतिक्रिया दिनुहोस् !