२६ साउन,बारा । मधेस मिडिया काउन्सिल र नेपाल पत्रकार महासंघ बाराको संयुक्त आयोजनामा पत्रकार आचारसंहिता र पत्रकारका समस्या विषयक अन्तरक्रिया कार्यक्रम सम्पन्न भएको छ।
कार्यक्रममा पत्रकारिताका विभिन्न पाटो, चुनौती र सम्भावनाबारे छलफल भएको थियो।
कार्यक्रमका प्रमुख अतिथि मधेस मिडिया काउन्सिलका कार्यबाहक अध्यक्ष सुरेश यादवले पत्रकारले कुनै पनि दलको आस्था राखे पनि कसैको गुलाम भएर काम गर्न नहुने बताएका छन्।
उनले पत्रकारले सधैँ समाजको आवश्यकता अनुसारका समाचार लेख्नुपर्ने र समाचार संकलन गर्दा वा फोटो खिच्दा सम्बन्धित व्यक्तिको अनुमति लिनुपर्नेमा जोड दिए। यसका साथै उनले विज्ञापनलाई एकद्वार प्रणालीमार्फत वितरण गर्नुपर्ने आवश्यकता रहेको पनि औँल्याए।
कार्यक्रममा मधेस मिडिया काउन्सिलका सदस्यहरू बन्दना झा, रिन्कु मिश्र, गायत्री, मनु पासवान लगायतले सामाजिक सञ्जाल र युट्युबमा हुने गलत पत्रकारिताले गर्दा वास्तविक पत्रकारिता ओझेलमा परेको धारणा राखेका थिए। उनीहरूले यस्ता विकृतिहरूलाई रोक्न सबै पत्रकार एकजुट हुनुपर्नेमा जोड दिएका छन्।
उक्त कार्यक्रममा नेपाल पत्रकार महासंघका बाराका अध्यक्ष रमेश सुबेदी, केन्द्रीय सदस्य सिकेन्द्र पासवान, मधेस प्रदेश कोषाध्यक्ष अनिल गौरव, सदस्य साजिर मन्सुर लगायत बारा जिल्लाका पत्रकारहरूको बाक्लो उपस्थिति रहेको थियो।
प्रतिक्रिया दिनुहोस् !